Վարշավան հույս ունի թուլացնել ԵՄ-ի հետ լարվածությունը երկխոսության միջոցով։ Այս մասին հայտարարել է Լեհաստանի նորանշանակ վարչապետ Մաթեուշ Մորավեցկին Եվրահանձնաժողովի ղեկավար Ժան Կլոդ Յունկերի հետ հանդիպման ժամանակ, հաղորդում է Reuters-ը:

Նրա խոսքով՝  լրացուցիչ ջանքերի դեպքում հնարավոր է պարզել բոլոր թյուրըմբռնումները: Սակայն նա հրաժարվել է պատասխանել այն հարցին, թե արդյոք Լեհաստանը զիջումների կգնա դատավարական բարեփոխումների հարցում, որոնք հանդիսանում են Վարշավայի եւ Բրյուսելի միջեւ  լարվածության պատճառը:

Իշխող Լեհաստանի իրավունք եւ արդարություն կուսակցությունը պնդում է նշված բարեփոխման շուրջ, քանի որ գտնում է, որ երկիրը կորցրել  է իր կաթոլիկ արմատները եւ խրվել է հետխորհրդային կոմունիստական մտածելակերպի մեջ: Լեհաստանի կառավարության հակառակորդները կարծում են, որ դատարանների եւ մեդիայի նկատմամբ վերահսկողության ուժեղացումը երկիրում կհանգեցնի ավտորիտարիզմի:

Հունվարի 10-ին հանդես գալով օտարերկրյա լրատվամիջոցների առաջ՝  Մորավեցկին ասել է, որ Վարշավան ցանկանում է կառուցողական դեր խաղալ ԵՄ-ի ապագայի վերաբերյալ բանակցություններում:

Լեհաստանի կառավարությունում նախօրեին տեղի էին  ունեցել կադրային փոփոխություններ, մասնավորապես, աշխատանքից ազատվել են ամենից հաճախ քննադատված նախարարները: Դրանց թվում են նաեւ պաշտպանության նախարարը եւ արտաքին գործերի նախարարը:

Որոշ վերլուծաբաններ նշում են, որ այս քայլը նպատակ ունի բարելավել  կուսակցության հեղինակությունն երկրի ներսում եւ երկրի սահմաններից դուրս։