ՀՀ գլխավոր դատախազությունը մանրակրկիտ ուսումնասիրում է ՀՀ վերահսկիչ պալատի խորհրդի կողմից ՀՀ արդարադատության նախարարության ԴԱՀԿ ծառայությունում իրականացված՝ 2016-2017թթ. ընթացքում պետական բյուջեից հատկացված միջոցների օգտագործման, բյուջետային մուտքերի ապահովման նկատմամբ վերահսկողության արդյունքները: Ուսումնասիրությամբ ի հայտ բերված՝ առերեւութ հանցագործության հատկանիշներ պարունակող խախտումների փաստերով ՀՀ գլխավոր դատախազության ավագ դատախազի կողմից արդեն իսկ հարուցվել է 5 քրեական գործ, որոնցով ՀՀ ՀՔԾ-ում իրականացվում է նախաքննություն:

Վերոնշյալից բացի, սակայն, շարունակվող ուսումնասիրությամբ ի հայտ են բերվել նաեւ ՀՀ ճանապարհային ոստիկանության եւ ՀՀ արդարադատության նախարարության ԴԱՀԿ ծառայությունների աշխատակիցների կողմից թույլ տրված թերությունների եւ բացթողումների, ինչպես նաեւ նրանց գործառույթների հետ կապված իրավական, ծրագրային եւ կազմակերպչական բնույթի խնդիրներ:

Պարզվել է, որ ՀՀ ԱՆ ԴԱՀԿ ծառայու­թյան եւ ՀՀ ԿԱ ՊԵԿ-ի միջեւ էլեկտրո­նային փաստաթղթաշրջանառու­թյու­նում առկա են ինչպես իրավա­կան, այնպես էլ ծրագրա­յին բնույթի բացթողումներ եւ թերություն­ներ, որոնց հետեւանքով կատարո­ղական վարույթներով բավականին խոշոր գումարներ հնարավոր չի եղել բռնագանձել պետբյուջե:

Մասնավորապես ՀՀ ԱՆ ԴԱՀԿ ծառայության եւ ՀՀ ԿԱ ՊԵԿ-ի միջեւ էլեկտրոնային փաստաթղթաշրջանառությունը սահմանող ՀՀ արդարադատության նախարարի հրամանով ՊԵԿ-ից ֆիզիկական անձանց եկամուտների վերաբերյալ տեղեկատվություն ստանալու պահանջ նախատեսված չի եղել,  ինչի պատճառով նշված ժամանակաընթացքում տասնյակ հազարավոր պարտապաններ աշխատել են, ունեցել եկամուտ, սակայն հարկադիր կատարողները նրանց նկատմամբ բռնագանձման ենթակա գումարով վարույթներն ավարտել են պարտապանի կողմից գույք կամ եկամուտ չունենալու, ինչպես նաեւ պարտապանի կամ նրա գույքի գտնվելու վայրը հայտնի չլինելու հիմքերով:

Բացի այդ, պարզվել է, որ ծառայության մշակած էլեկտրոնային եղանակով հարցման համապատասխան ձեւում խիստ թերի են սահմանված իրավաբանական անձանց հաշվարկային հաշվեկշիռների վերաբերյալ տեղեկություններ պահանջելու, իսկ էլեկտրոնային եղանակով ստացված պատասխաններում հիմնական եւ դրամական միջոցների, հումքնյութերի եւ դեբիտորական պարտքերի մասին տեղեկություններ ներկայացնելու կարգերը: Դրա հետեւանքով հնարավոր չի եղել տվյալներ ստանալ պարտապան կազմակերպությունների հաշվապահական հաշվեկշիռներում առկա դրամական ակտիվների վերաբերյալ եւ գումարների բռնագանձման ուղղությամբ իրականացնել արդյունավետ կատարողական գործողություններ:

Ուսումնասիրությամբ պարզվել է նաեւ, որ 2016-2017թթ. ընթացքում Ճանապարհային ոստիկանության աշխատակիցները ԴԱՀԿ ծառայություն ուղարկված էլեկտրոնային հաղորդագրություններում չեն ներառել կամ թերի են լրացրել  կատարողական վարույթներ հարուցելու համար անհրաժեշտ, համապատասխան իրավական ակտերով նախատեսված պարտադիր տվյալները, կամ վարչական ակտերը կատարման են ներկայացվել ժամկետների խախտմամբ, ինչի հետեւանքով էլեկտրոնային համակարգը մերժել է կատարողական վարույթների հարուցումը, եւ պետբյուջե չեն բռնագանձվել բավականին խոշոր չափերի գումարներ:

Նկատի ունենալով, որ վերոնշյալ խնդիրները պետական շահերի պատշաճ պաշտպանությունն ապահովելու տեսանկյունից հրատապ լուծման անհրաժեշտություն են առաջացնում՝ ՀՀ գլխավոր դատախազը գրություններ է հասցեագրել ՀՀ արդարադատության նախարարին եւ ՀՀ ոստիկանապետին: