Չինաստանի դատարանը կաշառք ստանալու գործով 14 տարվա ազատազրկման է դատապարտել Ուհանի նախկին քաղաքապետ Չժոու Սյանվանին։ Բացի այդ, նրա նկատմամբ սահմանվել է 5 միլիոն յուանի (մոտ 700 հազար դոլար) չափով տուգանք, հայտնում է Jiemian News-ը՝ հղում անելով Հենան նահանգի Շանցյու քաղաքի միջին ատյանի ժողովրդական դատարանի վճռին։

Ինչպես պարզել է դատարանը, 2003 թվականից մինչև 2025 թվականի մայիսն ընկած ժամանակահատվածում Չժոուն օգտագործել է իր պաշտոնեական դիրքն ու ծառայողական կապերը՝ ընկերություններին և մասնավոր անձանց աջակցություն ցուցաբերելու համար։ Մասնավորապես, խոսքը շինարարական պայմանագրերի կնքման, բիզնես վարելու և վարչական թույլտվություններ ստանալու մասին է։ Դրա դիմաց նա ստացել է ավելի քան 60․5 միլիոն յուանի (մոտ 8․5 միլիոն դոլար) ընդհանուր արժողությամբ գույք և դրամական միջոցներ։

Իր կարիերայի ընթացքում Չժոուն մի շարք ղեկավար պաշտոններ է զբաղեցրել Հուբեյ նահանգում։ Նա ղեկավարել է Հուանշի քաղաքի վարչակազմը, եղել է նահանգի փոխնահանգապետը, իսկ 2018 թվականի մայիսին դարձել է Ուհանի քաղաքապետի ժամանակավոր պաշտոնակատար։ Ավելի ուշ նա պաշտոնապես հաստատվել է այդ պաշտոնում։

Չժոուն ղեկավարել է Ուհանը COVID-19 համավարակի բռնկման շրջանում և քաղաքապետի պաշտոնը թողել է 2021 թվականի հունվարին։ Հետագայում նա զբաղեցրել է Հուբեյ նահանգի Ժողովրդական քաղաքական խորհրդատվական խորհրդի փոխնախագահի պաշտոնը, որը լքել է 2023 թվականի հունվարին։

2025 թվականի հուլիսին Չժոուն հայտնվել էր քննության տակ՝ կարգապահության և օրենքի լուրջ խախտումների կասկածանքով։ 2026 թվականի հունվարին նրան հեռացրել են Չինաստանի Կոմունիստական կուսակցությունից և ազատել պետական ծառայությունից։

2026 թվականի հուլիսին կայացած դատաքննության ընթացքում Չժոուն ընդունել է մեղքը և զղջում հայտնել։ Դատարանը հաշվի է առել, որ հանցագործությունների մի մասը մինչև վերջ չի հասցվել, ամբաստանյալը քննությանը նախկինում անհայտ տեղեկություններ է տրամադրել կաշառքների վերաբերյալ, ակտիվորեն վերադարձրել է ապօրինի ստացված միջոցները, իսկ հանցագործության հետ կապված գույքի մեծ մասն արդեն առգրավված է եղել։

Այս հանգամանքները հաշվի առնելով՝ դատարանը որոշել է մեղմել պատիժը։ Բռնագրավված հանցավոր եկամուտներն ու դրանցից ստացված լրացուցիչ միջոցները պետք է փոխանցվեն պետությանը, իսկ մնացած գումարը, եթե այդպիսին կա, կարգադրվել է գանձել լրացուցիչ կարգով։

Դատավճիռը կայացրել է առաջին ատյանի դատարանը։