ԱՄՆ նախագահ Դոնալդ Թրամփը արգելել է հրապարակել սենատոր Ջոն Մաքքեյնի մահվան առնչությամբ պատրաստված հաղորդագրությունը, հայտնում է Washington Post-ը։  Պարբերականի տվյալներով՝ Սպիտակ տան աշխատակիցները պատրաստել էին հայտարարություն, որում Մաքքեյնը մեծարվում էր Վիետնամական պատերազմում եւ գերության մեջ հերոսության եւ ԱՄՆ-ին ծառայելու համար։

Սակայն Թրամփը հայտարարել է, որ նախընտրում է թվիթը, չնայած դրա դեմ են հանդես եկել մամուլի քարտուղար Սառա Սանդերսն ու Սպիտակ տան աշխատակազմի ղեկավար Ջոն Քելին։

Մաքքեյնի մահվանից հետո Թրամփը ցավակցական թվիթ է հրապարակել, սակայն Սպիտակ տան պաշտոնական հայտարարություն դեռեւս չկա։

Հիշեցնենք՝ Մաքքեյնը մահացել է ուղեղի քաղցկեղից, նրա հուղարկավորությունը տեղի կունենա սեպտեմբերի 2-ին Մերիլենդ նահանգի Անապոլիս մայրաքաղաքում։

New York Times-ը ավելի վաղ հայտնել էր, որ Թրամփին չեն հրավիրել Մաքքեյնի հուղարկավորությանը։ Թրամփը նախկինում թշնամացած էր Մաքքեյնի հետ, սենատորը քննադատում էր նախագահին, այդ թվում՝ ՌԴ-ի նկատմամբ մեղմ քաղաքականության համար։