Խորհրդարանական երեք ուժերի կողմից ստորագրված կոալիցիոն նոր հուշագիրը արտառոց երեւույթ է, որից  քաղաքական առեւտրի հոտ է գալիս: Այս մասին NEWS.am-ի թղթակցի հետ զրույցում ասաց ԱԺ ՀՅԴ խմբակցության քարտուղար Արտյուշա Շահբազյանը: Նա նշեց հուշագրի  արտառոց կետերը, ըստ այդմ, հուշագրում խոսվում է 2013 թվականի նախագահի ընտրություններում գործող նախագահին սատարելու մասին, այն դեպքում, երբ մինչ այդ` 2012-ին պետք  է տեղի ունենան խորհրդարանի ընտրություններ: «Այնպիսի տպավորություն է, որ մեր խորհրդարանական գործընկերները կանխավ գիտեն, որ 2012-ին  անցնելու են խորհրդարան եւ, դեպքերից առաջ ընկնելով, խոսում են նախագահի  ընտրությունների մասին»,- նշեց Շահբազյանը: Պատգամավորի  գնահատմամբ ` արտառոց է նաեւ  հուշագրում առկա  ձեւակերպումը, թե «կոալիցիոն կուսակցությունները միասնական են եւ նպատակ չունեն գալիք խորհրդարանական ընտրություններում իրենց քաղաքական կշիռն ավելացնել միմյանց դեմ պայքար ծավալելու եւ կոալիցիայի ներսում ուժերի հարաբերակցությունը փոխելու հաշվին»:  

Այս ձեւակերպումը , ըստ Շահբազյանի, հուշում է, թե ապագա խորհդարանում ով ինչ տոկոսներ պետք է հավաքի: «Սրանով ուզում են ասել, որ եթե խորհրդարանում մի 20 մարդ կա, ովքեր իրենց անհանգստացնում են իրենց քննադատությամբ, եւ ուզում են, որ էդ 20-նն էլ չլինի եւ իրենց համար հանգիստ ապրեն խորհրդարանում»:

ՀՅԴ-ական պատգամավորը նշեց նաեւ, որ տպավորություն է, թե հուշագրից հետո կոալիցիոն երեք ուժերը` ՀՀԿ-ն, ԲՀԿ-ն եւ ՕԵԿ-ը խորհրդարանի ընտրություններին պետք է  մասնակցեն միասնական ցուցակով: Դա է վկայում հուշագրում առկա այն ձեւակերպումը, թե այդ ուժերը միմյանց հետ մրցելու նպատակ չունեն:

«Հարց է առաջանում` այս հուշագրից հետո այդ ուժերը առանձին, ինքնուրույն ուժե՞րն են, թե արդեն ձուլվել են միմյանց»,- տարակուսեց Շահբազյանը: Նա նաեւ հավելեց, որ այս նոր հուշագրում պետք է միջանկյալ անդրադարձ լիներ նախորդ` ՀՀԿ-ԲՀԿ-ՕԵԿ կոալիցիոն հուշագրին, որում պետք է նշվեր, թե այս ընթացքում արդյո՞ք այդ քաղաքական ուժերին հաջողվել է ի կատար ածել նախորդ հուշագրում առաջ քաշված նպատակները, նշել այն կետերը, որոնք չեն կատարվել, եւ հիշատակել դրա  պատճառները: «Կարծես ամեն ինչ շատ հոյակապ է եւ այս պահին երկրի միակ պրոբլեն այն է, թե ինչպես պետք է հաղթել հաջորդ ընտրություններում: Հուշագիրը վկայում է, որ իշխանությունը ամենեւին էլ մտահոգված չէ ժողովրդին հուզող ավելի կարեւոր խնդիրներով»,- նկատեց ՀՅԴ խմբակցության  քարտուղարը: