նախընտրելի դարձնել
Հունաստանում, որտեղ այսօր 24-ժամյա գործադուլ է ընթանում, բախումներ են տեղի ունեցել ցուցարարների եւ ոստիկանների միջեւ, հաղորդում է BBC-ն:
Ըստ այդմ, բախումները տեղի են ունեցել Աթենքում, խորհրդարանի շենքի առջեւ, որտեղ մոտ 30 հազար ցուցարար է հավաքվել: Ոստիկանները արցունքաբեր գազ են կիրառել, երբ իրենց վրա քարեր եւ պլաստիկե շշեր են նետվել:
Ինչպես արդեն հայտնել է NEWS.am-ը, Հունաստանում 24-ժամյա գործադուլ է. հաստատություններն ու տրանսպորտը կաթվածահար են եղել: Գործադուլը հայտարարվել է կառավարության գործունեության դեմ, որը «գոտիների ձգման» քաղաքականություն է վարում` Եվրամիության եւ ԱՄՀ-ի վարկերի դիմաց:
Վարկատուները փրկել են Հունաստանին դեֆոլտից աննախադեպ 110 միլիարդանոց վարկերի դիմաց` պահանջելով կրճատել բյուջեն եւ արմատական բարեփոխումներ անցկացնել:
Փետրվարի 23-ին Հունաստանում գործադուլ են անում պետական հաստատություններն ու բանկերը, դպրոցներն ու համալսարանները, նվազագույն անձնակազմով են աշխատում հիվանդանոցները, իսկ լրատվամիջոցները նորությունների թողարկումներ չեն տալիս:
Լիովին դադարեցվել է երկաթուղային եւ լաստանավային հաղորդակցությունը:
Հանրահավաքներին միանալու են նաեւ ձեռնարկատերերը, ովքեր փակելու են իրենց օբյեկտները ի նշան կառավարության քաղաքականության դեմ բողոքի:
