Ֆրանսիացի զինվորականները երկրի պատմության մեջ առաջին անգամ սկսել են տիեզերքում AsterX զորավարժությունները, որն այսպես է կոչվել ի պատիվ 1965 թվականին արձակված ֆրանսիական արբանյակի, հայտնում է Les Echos պարբերականը:

Պարբերականի տեղեկություններով՝ զորավարժությունների ժամանակ մասնագետները ստուգելու են պոտենցիալ վտանգավոր իրադարձություններին համապատասխան ստորաբաժանումների արձագանքման հնարավորությունները: Օրինակ՝ տիեզերքում լրտես արբանյակների կամ սպառնացող օբյեկտների հայտնաբերումը:

Ֆրանսիայի Տիեզերական ուժերի հրամանատարության ղեկավար Միշել Ֆրիդլինգը հայտարարել է, որ զորավարժությունները «համակարգերի համար յուրատեսակ սթրես-թեստ» են: Նա նաեւ նշել է, որ դրանք առաջինն են ոչ միայն ֆրանսիական բանակի համար, այլեւ ամբողջ ԵՄ-ի: