նախընտրելի դարձնել
Անհայտ անձինք կարճ ժամանակով առեւանգել եւ խոշտանգել են Պակիստանում Աֆղանստանի դեսպանի դստերը, հայտնել է Reuters-ը՝ հղում անելով Աֆղանստանի կառավարությանը:
Սիլսիլա Ալիխիլին առեւանգել են տուն վերադառնալիս, մի քանի ժամ պահել եւ «դաժանորեն խոշտանգել են», - ասվում է Աֆղանստանի ԱԳՆ հայտարարության մեջ՝ առանց Իսլամաբադում տեղի ունեցած առեւանգման մասին այլ մանրամասների:
«Գերությունից ազատվելուց հետո տիկին Ալիխիլը բժշկական հսկողության տակ է գտնվում հիվանդանոցում», - ասվում է հայտարարության մեջ, որով հորդորում են հետաքննություն իրականացնել եւ պաշտպանել աֆղանստանցի դիվանագետներին:
Ոստիկանությունը հետաքննում է միջադեպը, ուժեղացվել է դեսպանի ու նրա ընտանիքի անվտանգությունը:
Պակիստանն ու Աֆղանստանը վաղուց սառը հարաբերություններ ունեն: Քաբուլը Պակիստանին մեղադրում է թալիբներին ապաստան տրամադրելու մեջ, իսկ Իսլամաբադը Քաբուլին այն բանի համար, որ զինյալներին թույլ է տալիս օգտվել իր տարածքից՝ Պակիստանում հարձակումներ իրականացնելու համար:
Երկու երկրներն էլ հերքում են առաջադրված մեղադրանքները:
