Նախընտրելի
Մարդկությունը հնարավորություններ չունի սահմանափակելու գլոբալ տաքացումը եւ հասցնելու Փարիզի կլիմայական նպատակին՝ 1,5 աստիճանին, The Guardian-ը մեջբերում է Microsoft-ի հիմնադիր Բիլ Գեյթսին։
«Լուծումը կայանում է տաքացումը առավելագույնս նվազեցնելու մեջ։ Ներկայումս 2,5°C-ից ցածր մնալը ուղղակի ֆանտաստիկ կլիներ։ Կարծում եմ՝ դա հնարավոր է», — ասել է նա։
Գեյթսը հավելել է, որ թեեւ մալարիան դեռ շատ երեխաներ է սպանում (տարեկան 400.000), արժե մեծ ներդրումներ կատարել կլիմայական ճգնաժամի դեմ պայքարում, քանի որ ժամանակի ընթացքում այն ավելի ու ավելի կվատթարանա։
Նրա խոսքով՝ միջուկային տրոհումը եւ սինթեզը, էներգիայի շատ, շատ խոստումնալից աղբյուրներ են, որոնք կախված չեն եղանակից։
«Նույնիսկ եթե միջուկային էներգետիկան հաջողության հասնի, մենք միեւնույն է դեռ վերականգնվող էներգիայի 60-70 տոկոս կարիք կունենանք։ Կարծում եմ, որ աշխարհը բավականաչափ ներդրումներ չի կատարում այս [միջուկային] նորարարությունների մեջ, դրանք կարող են հսկայական նշանակություն ունենալ», - ասել է Գեյթսը:
