Սլովակիան ներքաղաքական մակարդակով, ինչպես նաեւ Եվրահանձնաժողովի եւ Կիեւի հետ, բանակցություններ կսկսի Ուկրաինային «ՄիԳ-29» կործանիչների փոխանցման շուրջ։ Այս մասին ուրբաթ օրը կայացած մամուլի ասուլիսում հայտարարել է վարչապետի պաշտոնակատար Էդուարդ Հեգերը, մատակարարումների մասին Ուկրաինայի նախագահ Վլադիմիր Զելենսկին նախօրեին է խնդրել, գրում է «Коммерсантъ»-ը։

Հեգերն ընդգծել է, որ «ՄիԳ-29» կործանիչները շահագործումից հանվել են, եւ Սլովակիան չի կարող դրանք օգտագործել։ «Հենց այդ շահագործումից հանված «Միգ»-երը կարող են անմեղ կյանքեր փրկել Ուկրաինայում»,- ասել է նա: Եվ վարչապետի պաշտոնակատարն ակնկալում է, որ առաքված ինքնաթիռների արժեքը Բրյուսելը կփոխհատուցի։

«Յուրաքանչյուր օգնություն, որը մենք տրամադրում ենք այս կերպ, վճարվում է Խաղաղության եվրոպական հիմնադրամի կողմից»,- ասել է Էդուարդ Հեգերը:

Նա նաեւ հայտնել է, որ կառավարությունը բանակցություններ է վարում իրավաբանների հետ՝ անհատական միջոցներ ձեռնարկելու հնարավորության շուրջ, քանի որ ներկայիս կաբինետը ժամանակավոր է եւ սահմանափակ լիազորություններ ունի։ Այն դեպքում, երբ անհրաժեշտ լինի փոխել Սլովակիայի սահմանադրությունը կամ ընդունել համապատասխան օրենք Ուկրաինային օգնելու համար, պարոն Հեգերը կարծում է, որ դա խնդիր չի լինի։

Բրյուսելում ԵՄ գագաթաժողովում Սլովակիայի վարչապետի պաշտոնակատարի հետ հանդիպման ժամանակ Զելենսկին պաշտոնապես խնդրել է «ՄիԳ-29» կործանիչներ մատակարարել։ Էդուարդ Հեգերը պատասխանել է, որ Սլովակիան հնարավոր ամեն ինչ կանի այս խնդրանքը կատարելու համար։