Ուկրաինայի նախագահ Վլադիմիր Զելենսկին երեքշաբթի հեռախոսազրույց է ունեցել Եվրահանձնաժողովի ղեկավար Ուրսուլա ֆոն դեր Լյայենի հետ:

Զրույցի մասին նախագահը պատմել է իր պաշտոնական Telegram-ալիքում, գրում է  «Европейская правда»-ն։

Ուկրաինայի նախագահի խոսքով՝ նա շնորհակալություն է հայտնել Եվրահանձնաժողովի նախագահին Բուչանի գագաթաժողովին մասնակցելու համար եւ նրա հետ քննարկել ապագայի համար համատեղ միջազգային միջոցառումները:

Բացի այդ, կողմերն անդրադարձել են Ուկրաինային աջակցելու այլ հարցերի, մասնավորապես պատժամիջոցների 11-րդ փաթեթի նախապատրաստման անհրաժեշտությանը եւ Եվրահանձնաժողովի հանձնարարականների կատարման առաջընթացին:

Զելենսկին նշել է, որ մշտական կապ է պահպանում Ուրսուլա ֆոն դեր Լյայենի հետ։

Եվրահանձնաժողովը երեքշաբթի ավելի վաղ նշել է, որ ֆոն դեր Լյայենը զրույց կունենա Զելենսկու հետ Չինաստան իր այցի մեկնարկից առաջ:

Եվրահանձնաժողովի ղեկավարը զրույցի արդյունքներով հայտնել է, որ Ուկրաինան Չինաստանի ղեկավարության հետ իր հանդիպումների կարեւոր թեման կլինի: