Մ-10 միջպետական ավտոճանապարհի կմ117+042 հատվածում (Գետափ գյուղի մոտ) Եղեգիս գետի վրա կառուցված կամուրջը երկկողմանի երթևեկելի է։

Հիշեցնենք, որ ապրիլի սկզբին կամրջի երթևեկելի մասում գետի ջրի հոսքի պատճառով առաջացել էր հողաշերտի սահք՝ ստեղծելով փլուզման վտանգ։

«Ճանապարհային դեպարտամենտ» հիմնադրամից NEWS.am-ին հայտնում են, որ ճանապարհների ընթացիկ սպասարկման շրջանակներում կապալառու կազմակերպությունը՝ «ՌաֆԷլԳրիգ» ՓԲԸ-ն, մինչ կամրջի հիմնանորոգումը ժամանակավոր լուծում է տվել, կատարել է վերականգնման աշխատանքներ՝ ապահովելով կամրջով երկկողմանի երթևեկությունը։

Տեղեկացնենք, որ կամրջի հիմնանորոգման համար հայտարարված նախագծման մրցույթը կայացել է, և աշխատանքներն այժմ նախագծման փուլում են։