Կան մարդիկ, որոնց մոտ կարմիր գինի խմելը, թեկուզ փոքր քանակությամբ, գլխացավեր է առաջացնում, սովորաբար ընդամենը մի փոքր բաժակ խմելուց հետո՝ 30 րոպեից երեք ժամ հետո:

Ըստ Scientific Reports ամսագրում հրապարակված արդյունքների՝ մեղավորը, ըստ երևույթին, կվերցետին է՝ ֆլավանոլ, օրգանական նյութ, որը հայտնաբերվում է մրգերի և բանջարեղենի մեջ:

Կվերցետինը օգտակար հակաօքսիդանտ է համարվում, սակայն այն կարող է խնդիրներ առաջացնել, երբ մարմինն այն վերամշակում է ալկոհոլի հետ մեկտեղ, ասում են հետազոտողները:

«Երբ այն մտնում է ձեր արյան մեջ, ձեր մարմինն այն վերածում է մեկ այլ ձևի, որը կոչվում է կվերցետին գլյուկուրոնիդ», - ասում է հետազոտության համահեղինակ, գինու քիմիկոս և Կալիֆորնիայի Դևիսի համալսարանի խաղողագործության և գինեգործության ամբիոնի պատվավոր պրոֆեսոր Էնդրյու Ուոթերհաուսը։ «Այս ձևով այն արգելափակում է ալկոհոլի նյութափոխանակությունը»,- նշում է նա։

Իր հերթին, կվերցետինի փոխազդեցությունն ալկոհոլի հետ ստիպում է մարմնում կուտակել ացետալդեհիդ կոչվող թույնը, բացատրում է առաջատար հեղինակ Ապրամիտա Դևին, որը համալսարանի խաղողագործության և գինեգործության ամբիոնի ասպիրանտ է:

«Ացետալդեհիդը հայտնի թունավոր, գրգռիչ և բորբոքային նյութ է: Գիտնականները գիտեն, որ ացետալդեհիդի բարձր մակարդակը կարող է առաջացնել դեմքի կարմրություն, գլխացավեր և սրտխառնոց»,- նշել են գիտնականները։