նախընտրելի դարձնել
Հայկական կողմի հումանիտար մնացած խնդիրները լուծելու համար միջազգային հանրության վրա ճնշում գործադրելու համար փափուկ ուժի կիրառման հարցում կարևոր է սփյուռքի դերը։ Այս մասին NEWS.am-ի թղթակցի հետ զրույցում ասաց ֆրանսիայից քաղաքական գործիչ Հիլդա Չոբոյանը։
«Մենք ունենք բավականին լուրջ հնարավորություններ և լծակներ՝ ճնշում գործադրելու երկրների (հատկապես ժողովրդավարական) կառավարությունների վրա՝ լուծելու մարդասիրական խնդիրները, որոնք քաղաքական հարթություն միշտ ավելի հեշտ է բարձրացնել, քան քաղաքական խնդիրները։
Մնացած բանտարկյալների, այդ թվում՝ Արցախի բարձրաստիճան պաշտոնյաների խնդրի վերաբերյալ մեր խոսքը ազգային կառավարություններին հասցնելու լուրջ հնարավորություններ կան։ Այլ հարց է, թե այս ամենն ինչ ազդեցություն կունենա Ադրբեջանի վրա գերիների ազատ արձակման հարցում։
Ադրբեջանն ահաբեկչական պետություն է և բանտարկյալներին ազատ է արձակում միայն իր քաղաքական շահերից ելնելով։ Ադրբեջանը, օգտվելով աշխարհում տիրող անկայուն իրավիճակից, փորձում է առաջ մղել իր շահերը և չի կարող վստահելի գործընկեր համարվել»,- նշել է Չոբոյանը։
Այն, որ միջազգային հանրությունը, Ադրբեջանի հետ հարաբերություններում, հետին պլան է մղում հումանիտար հարցը և նախապատվությունը տալիս տնտեսական շահերին, նույնպես կապված է Երևանի ոչ միանշանակ քաղաքական հռետորաբանության հետ, կարծում է նա։
«Մի կողմից Հայաստանի ԱԳՆ ղեկավարը միջազգային հարթակներում խոսում է էթնիկ զտումների մասին, մյուս կողմից՝ Հայաստանի իշխանությունները Ադրբեջանի հետ բանակցում են այլ թեմաներով։
Երևանից նման ոչ միանշանակ գիծը հանգեցնում է նրան, որ միջազգային հանրությունը պատասխանատվություն չի զգում։
Լուծումը պետք է գա Հայաստանի իշխանություններից, թեև պատասխանատվություն են կրում նաև հասարակական կազմակերպությունները, որոնք պասիվ են և այս բոլոր խնդիրները չեն բարձրացնում միջազգային հարթակներում»,- ընդգծեց քաղաքական գործիչը։
