Մեծ Բրիտանիայի գիտնականները հազարավոր տարիներ առաջ ապրած մարդկանց գենետիկ հիվանդությունները նույնականացնելու  միջոց են հայտնաբերել:

Communications Biology ամսագրում հրապարակված նոր հետազոտության մեջ հետազոտողները հայտնաբերել են սեռական քրոմոսոմային սինդրոմներ Բրիտանիայում հայտնաբերված վեց հնագույն կմախքների ԴՆԹ-ում:

«Ուսումնասիրության ընթացքում մենք վերակառուցում ենք հին Բրիտանիայից անեուպլոիդայով (լրացուցիչ կամ բացակայող քրոմոսոմներ) ունեցող 6 առանձնյակի պրոֆիլները», - ասել է հետազոտության մասնակից Կակիա Անաստասիադուն:

Անաստասիադուն և Լոնդոնի Ֆրենսիս Քրիքի ինստիտուտի նրա գործընկերները ուսումնասիրել են այս հնադարյան մարդկանց ԴՆԹ-ն և հայտնաբերել չորս ծանոթ վիճակների առկայություն՝ Դաունի, Թերների, Ջեյքոբի և Կլայնֆելտերի համախտանիշեր:

Մարդու բջիջները պարունակում են 23 զույգ ԴՆԹ մոլեկուլներ, որոնք կոչվում են քրոմոսոմներ: Սեռական քրոմոսոմները սովորաբար XX են կանանց և XY տղամարդկանց համար:

Սեռական քրոմոսոմային խանգարումները տեղի են ունենում, երբ մարդու բջիջներն ունեն կա՛մ ավելորդ, կա՛մ բացակայող քրոմոսոմ: Երբ դա տեղի է ունենում, մենք հաճախ տեսնում ենք այնպիսի հատկանիշներ, ինչպիսիք են վարքի տարբերությունները, զարգացման կանգը կամ արտաքին տեսքի փոփոխությունները:

Օգտագործելով նոր հաշվարկման մեթոդ՝ հետազոտողները չափել են քրոմոսոմների թիվը՝ հաշվելով X և Y քրոմոսոմների պատճենները և համեմատելով ստացված թիվը կանխատեսված ելակետային մակարդակի հետ:

Օգտագործելով այս մեթոդը՝ թիմը հայտնաբերել է Թերների համախտանիշով առաջին նախապատմական մարդուն (կին, որն ունի միայն մեկ X քրոմոսոմ երկուսի փոխարեն), որն ապրել է մոտ 2500 տարի առաջ:

Հետազոտողների խոսքով, նրանք հայտնաբերել են նաև Ջեյքոբի համախտանիշով առաջին մարդուն (հավելյալ Y քրոմոսոմով տղամարդ՝ XYY), Դաունի համախտանիշով երեխային (լրացուցիչ քրոմոսոմ) երկաթե դարից և երեք տղամարդու՝ Կլայնֆելտերի համախտանիշով   լրացուցիչ X քրոմոսոմով՝ XXY)  տարբեր ժամանակաշրջաններից:

Գիտնականների բացահայտումները կարող են հնարավորություն տալ փորձագետներին պատկերացում կազմել այն մասին, թե ինչպես էին հին հասարակությունները վերաբերվում գենդերային և սեռական տարբերություններին, ասվում է հետազոտության մեջ: Նրանց մեթոդները կարող են նաև օգնել մասնագետներին ավելին իմանալ հին ժողովուրդների և սովորույթների մասին: