նախընտրելի դարձնել
Իսրայելի ֆինանսների նախարար Բեցալել Սմոտրիչը և ազգային անվտանգության նախարար Իտամար Բեն Գվիրը շաբաթ երեկոյան հայտարարել են, որ չեն համաձայնի ԱՄՆ նախագահ Ջո Բայդենի առաջարկին և սպառնացել են լքել կառավարությունը, եթե նրա ծրագիրն ընդունվի, գրում է The Jerusalem Post-ը։
Սմոտրիչը X-ի իր միկրոբլոգում գրել է, որ խոսել է Իսրայելի վարչապետ Բենիամին Նաթանյահուի հետ և «հստակ հասկացրել, որ չի լինի մի կառավարության մաս, որը համաձայնում է առաջարկվող ծրագրին և ավարտում է պատերազմը՝ առանց ՀԱՄԱՍ-ը ոչնչացնելու և բոլոր պատանդներին վերադարձնելու»։
«Մենք չենք համաձայնի ավարտել պատերազմը, քանի դեռ ՀԱՄԱՍ-ը չի ոչնչացվել։ Մենք թույլ չենք տա, որ պատերազմի արդյունքները ձախողվեն՝ Իսրայելի պաշտպանության բանակը դուրս բերելով և Գազայի բնակիչներին թույլ տալով վերադառնալ հյուսիսային մաս։ Մենք թույլ չենք տա ահաբեկիչների զանգվածային ազատ արձակումը, որոնք կարող են վերադառնալ հրեաներին սպանելու համար»,- նշել է նա։
«Մենք ձգտում ենք Գազայում և Լիբանանում անվտանգության բոլորովին այլ իրականություն ստեղծելուն, որպեսզի բոլոր բնակիչները վերադառնան իրենց տները հյուսիսում և հարավում, և հսկայական ներդրումներ կատարել այդ տարածքների արագացված զարգացման համար», - հայտարարել է իսրայելցի նախարարը:
Իր հերթին, Բեն-Գվիրը շաբաթ երեկոյան հայտարարել է, որ «գործարքը, որի մանրամասները հայտնի են դարձել այսօր, նշանակում է պատերազմի ավարտ և ՀԱՄԱՍ-ի ոչնչացման նպատակից հրաժարում։ Սա անմիտ գործարք է, որը նշանակում է ահաբեկչության հաղթանակ և սպառնալիք Իսրայել պետության անվտանգությանը»:
Նա ընդգծել է, որ «նման գործարքին համաձայնելը ոչ թե բացարձակ հաղթանակ է, այլ բացարձակ պարտություն»։
«Մենք թույլ չենք տա, որ պատերազմն ավարտվի առանց ՀԱՄԱՍ-ի լիակատար ոչնչացման։ Եթե վարչապետը անխոհեմ գործարք կնքի այսօր հրապարակված պայմաններով, ինչը նշանակում է դադարեցնել պատերազմը և հրաժարվել ՀԱՄԱՍ-ի ոչնչացման նպատակից, Օցմա Յեհուդիտը կլուծարի կառավարությունը», - զգուշացրել է Բեն-Գվիրը:
Ավելի վաղ Իսրայելի ընդդիմության առաջնորդ Յաիր Լապիդը հայտարարել էր, որ կառավարությունը պետք է ընդունի ԱՄՆ նախագահ Ջո Բայդենի հայտարարած պատանդների մասին համաձայնագիրը։
«Իսրայելի կառավարությունը չի կարող անտեսել նախագահ Բայդենի կարևոր ելույթը։ Սեղանին գործարք կա, և կառավարությունը պետք է ընդունի այն»,- գրել է նա X-ի իր միկրոբլոգում։
«Ես Նաթանյահուին հիշեցնում եմ, որ նա պատանդների գործարքի համար ապահովագրական տարբերակ ունի, եթե Ազգային անվտանգության նախարար Իտամար Բեն-Գվիրը և ֆինանսների նախարար Բեցալել Սմոտրիչը լքեն կառավարությունը», - հավելել է նա: Վկայաբերելով իր խոստումը՝ աջակցելու կոալիցիային՝ գործարքն ապահովելու համար, եթե ծայրահեղ աջ կուսակցությունները հրաժարվեն աջակցությունից՝ նման համաձայնագրին իրենց հնարավոր անհամաձայնության պատճառով:
Իսրայելի վարչապետ Բենիամին Նաթանյահուն շաբաթ օրը հայտարարել է, որ Գազայում մշտական հրադադար չի լինի, քանի դեռ ՀԱՄԱՍ-ի ռազմական և կառավարման կարողությունները չեն ոչնչացվել:
Ավելի վաղ ԱՄՆ նախագահ Ջո Բայդենը հայտարարել էր, որ Իսրայելն առաջարկել է Գազայում եռաստիճան հրադադարի պայմանագիր՝ ՀԱՄԱՍ-ի կողմից պատանդներին ազատ արձակելու դիմաց։
