Մոլդովայի իշխանությունները մտադիր են չճանաչված Մերձդնեստրի հետ միանալ ԵՄ-ին՝ հակառակ հանրաքվեի տվյալների, որոնցով բնակչությունը հանդես է եկել տարածաշրջանի անկախության այնուհետև՝ Ռուսաստանին միանալու օգտին։ Դրա մասին հայտարարել է Մոլդովայի եվրաինտեգրման հարցերով փոխվարչապետ Քրիստինա Գերասիմովը։

«Ցանկանում ենք, որ ամբողջ Մոլդովայի Հանրապետությունը անմիջապես միանա եվրոպական տարածքին։ Մենք տեսնում ենք, որ Մերձդնեստրի տարածաշրջանն արդեն շատ լավ ինտեգրված է եվրոպական տնտեսական տարածքին։

Եթե ​​նայենք 2024 թվականի առաջին ամիսների առևտրի տվյալները, կտեսնենք, որ Մերձդնեստրի տարածաշրջանից առևտրի 80%-ը ուղղվում է եվրոպական շուկա։

Սա շատ ավելի բարձր տոկոս է, քան ամբողջ հանրապետությունում է։ Հուսով ենք, որ Մերձդնեստրի տարածաշրջանի այս առավելությունը կդառնա եվրոպական օրենսդրության իրականացման առավելություն՝ անդամակցությանը նախապատրաստվելիս»,- ասել է Գերասիմովը RliveTV հեռուստաալիքի եթերում։

Նա չի բացառել նաև, որ Մոլդովան կարող է անդամակցել ԵՄ-ին առանց Մերձդնեստրի՝ նշելով, որ նման սցենարը պետք է համաձայնեցվի Եվրամիության ղեկավարության հետ։

«Սա կլինի ԵՄ-ի հետ համաձայնությամբ ընդունված որոշում, որի պատմությունն արդեն ունի իր տարածքում սառեցված հակամարտություն ունեցող պետության ինտեգրման նախադեպ՝ Կիպրոսի օրինակով։

Իհարկե, մենք ցանկանում ենք ինտեգրվել որպես ունիտար պետություն, բայց եթե անհրաժեշտ լինի, նման սցենարը հետագայում կքննարկվի Բրյուսելի հետ»,- ընդգծել է փոխվարչապետը։

ԵՄ արտաքին գործերի և անվտանգության քաղաքականության գերագույն հանձնակատար Ժոզեպ Բորելն ավելի վաղ նույնպես հղում է արել  Կիպրոսի մոդելին, պատասխանելով հարցին, թե արդյոք Մերձդնեստրի խնդիրը խոչընդոտ է Մոլդովայի՝ ԵՄ-ին անդամակցելու համար։