Թուրքիայում «Մեծ մուրճ» հեղաշրջման գործով 3-րդ մեղադրական զեկույցն ընդունվել է Ստամբուլի ծանր հանցագործությունների գծով 10-րդ դատարանի կողմից։

Թուրքական Zaman-ի փոխանցմամբ՝ 143 կասկածյալների դեմ մեղադրական զեկույցը կազմված է 264 էջից։ Կասկածյալների համար դատախազությունը պահանջում է 15-20 տարի պատժաչափեր։ «Մեծ մուրճ-3» հեղաշրջման գործով առաջին դատական նիստը տեղի կունենա դեկտեմբերի 26-ին եւ կշարունակվի մինչեւ դեկտեմբերի 30-ը։

Ավելի վաղ պատրաստվել էր 1-ին եւ 2-րդ մեղադրական զեկույցները, որոնք դատավարության ընթացքում միավորվել են մեկ դատական գործի մեջ։  Միավորված դատական գործում հանդես են գալիս 224 կասկածյալներ որոնցից 184-ը կալանքի տակ են։

Նշենք, որ 2010-ի հունվարին  թուրքական Taraf-ը հրապարակել էր «Մեծ մուրճ» հեղաշրջման ծրագրի մանրամասներն, ըստ որի, նախատեսված է եղել երկրում ստեղծել քաոսային իրավիճակ՝  ապահովելու համար ռազմական հեղաշրջումը։

Թուրք գեներալները արդարանում են՝ պնդելով, թե դրանք զուտ ուսումնական վարժանքների համար են նախատեսված եղել:

«Մեծ մուրճ» հեղաշրջման նախագծի մեջ մեղադրվող  գեներալներից են՝ Թուրքիայի օդուժերի նախկին հրամանատար Հալիլ Իբրահիմը Ֆըրթնան, ծովային ուժերի նախկին հրամանատար Օզդեն Օրնեքը, 1-ին ցամաքային ուժերի հրամանատարության  նախկին հրամանատար Չեթին Դողանը, ԶՈՒ-ի կապի եւ էլեկտրոնային տեղեկատվության համակարգերի հրամանատար Քադիր Սաղդըչը, հյուսիսային ծովային ավազանի հրամանատար Մեհմեդ Օթուզբիրօղլուն եւ այլոք։