Ամերիկյան YouTube վիդեոհոսթինգն այժմ բարձր որակով տեսանյութեր չի հեռարձակում Ռուսաստանի տարածքի ստացիոնար համակարգիչներում և նոութբուքերում եղած բրաուզերների մեծ մասով, հայտնում է ՏԱՍՍ-ը։ Հեռարձակման հետ կապված խնդիրներ են առաջանում Google Chrome-ում, Opera-ում, Mozilla Firefox-ում և Mi Browser-ում:

Գործակալության տվյալներով, առայժմ միայն Yandex Browser-ն ու Safari-ն են կանոնավոր աշխատում, սակայն վերջինիս բջջային տարբերակը հղում է օգտատերին դեպի վիդեոհոսթինգի հավելվածը։

The Moscow Times-ը ստուգել է տեսանյութերի ներբեռնումը Google Chrome-ի և Mozilla Firefox-ի դեսքթոփի տարբերակներով: Առաջինի դեպքում տեսահոլովակն ընդհանրապես չի բացվում կամ հեռարձակվում է 144p-ով, երկրորդում՝ միայն 360p և ավելի ցածր որակով։ 720p-1080p ընտրելու դեպքում, հեռարձակումն ընդհատվում կամ դադարում է:

StatCounter-ի տվյալներով, երկրում ամենահայտնի բրաուզերը Chrome-ն է։ Մայիսի վերջին դրանից օգտվել է ռուսաստանցիների 49,16%-ը։ Երկրորդ տեղում Yandex.Browser-ն է՝ 22,91%: Եռյակը եզրափակում է Apple Safari-ն՝ 11,19%-ով։ Opera-ն նախընտրում է ռուսաստանցիների 6,95%-ը, ևս 4,85%-ը՝ Microsoft Edge-ը։ Firefox-ն օգտագործում է ռուսաստանցիների միայն 3,3%-ը։

Օգոստոսի 1-ից Ռուսաստանում YouTube-ի օգտատերերը սկսեցին զանգվածաբար տեղեկացնել հոսթինգի աշխատանքի կտրուկ վատթարացման մասին: Հաջորդ օրը Sboy.rf ծառայությունը գրանցեց ավելի քան 15 հազար բողոք, ինչը զգալիորեն գերազանցում է սովորական ցուցանիշները, որոնք օրական մի քանի տասնյակի էին հասնում։ Սրանից քիչ առաջ Պետդումայի տեղեկատվական քաղաքականության հանձնաժողովի ղեկավար Ալեքսանդր Խինշտեյնը հայտարարել էր օգոստոսի սկզբին YouTube-ի ներբեռնման արագությունը մինչև 70%-ով կրճատելու մասին։ Այս մասին բջջային օպերատորները սկսել էին նախազգուշացնել հուլիսի 30-ին։

Կրեմլը պնդում է, որ չի պատրաստվում սահմանափակել հարթակի աշխատանքը, և խնդիրները վերագրում Google-ի տեղական սարքավորումների հնացածությանը․ ընկերությունը լքել է Ռուսաստանը Ուկրաինա ներխուժումից հետո: «Շուկայից դուրս գալն ունի իր տեխնոլոգիական հետևանքները»,- ընդգծել է նախագահի մամուլի քարտուղար Դմիտրի Պեսկովը։

Նմանատիպ պարզաբանում է տվել «Ռոսկոմնադզորը»՝ վստահեցնելով, որ դրա մեղավորը Google-ի սարքավորումների մաշվածությունն է։ Սակայն ՏՏ մասնագետները պարզել են, որ YouTube-ում տեսանյութեր ներբեռնելու ներկայիս խնդիրները կապված չեն դրա հետ, պատճառն այն է, որ իշխանությունները միտումնավոր դանդաղեցնում են googlevideo.com տիրույթը, որտեղից տարածվում է տեսանյութը։ Ավելի ուշ Google-ն ինքը հաստատեց, որ կապ չունի հոսթինգի զանգվածային ընդհատումների հետ։ VPN-ից օգտվելիս տեսանյութեր ներբեռնելու հետ կապված խնդիրներ չկան:

Ինքը՝ Խինշտեյնը, նույնպես նշեց, որ սահմանափակումներն արհեստական են. նա YouTube-ի «դեգրադացիան» անվանեց «հարկադիր քայլ՝ ուղղված օտարերկրյա ռեսուրսի վարչակազմի դեմ», որն «անպատիժ խախտում և անտեսում է» Ռուսաստանի օրենսդրությունը։ Միևնույն ժամանակ, իշխանությունները տեղեկատվական արշավ սկսեցին, որը կոչված էր համոզելու ռուսաստանցիներին, որ առանց YouTube-ի իրենց համար ավելի լավ կլինի: Այն իրականացվում է բոտերի միջոցով:

Նախագահի աշխատակազմի աղբյուրը Gazeta.ru-ին հայտնել է, որ YouTube-ի հասանելիությունը կարող է սահմանափակվել արդեն սեպտեմբերին, իսկ ծառայության աշխատանքի դանդաղումը նախապատրաստություն է հարթակի ապագա արգելափակման համար։

Ռուսաստանում YouTube-ի օրական միջին ընդգրկումը կազմում է 55,4 միլիոն մարդ: Ռուսաստանի իշխանությունները Ուկրաինա լայնամասշտաբ ներխուժման հենց սկզբից պլանավորում էին արգելափակել հանրահայտ վիդեոհոսթինգը, այդ թվում՝ այն պատճառով, որ այն դարձել է ընդդիմության և հակապատերազմական օրակարգի հիմնական հարթակը: Mediascope-ի տվյալներով, այս տարվա ապրիլին 12 տարեկանից բարձր ռուսաստանցիների թիվը, որոնք վերջին ամսում գոնե մեկ անգամ օգտվել են YouTube-ից, կազմել է 95,86 մլն մարդ։