Ավստրալիայի կառավարությունը կիրակի օրը հայտարարել է, որ լրացուցիչ 95 միլիոն ավստրալական դոլար (64,13 միլիոն դոլար) կծախսի թռչնագրիպի ավերիչ շտամից պաշտպանվելու համար, որը տարածվել է ամբողջ աշխարհում թռչունների և կաթնասունների շրջանում, բայց դեռ չի հասել կղզի մայրցամաք, հայտնում է Reuters-ը:

Օվկիանիան աշխարհի վերջին տարածաշրջանն է, որը զերծ է թռչնագրիպի H5N1 խմբի 2.3.4.4b-ից, որը Ասիայում, Եվրոպայում և Աֆրիկայում հայտնվելուց ի վեր  2020 թ.-ին սպանել է հարյուր միլիոնավոր թռչունների և տասնյակ հազարավոր կաթնասունների, աղտոտել  լողափերը դրանց դիակներով և խաթարել գյուղատնտեսական արդյունաբերությունը։ Գյուղատնտեսության, ձկնորսության և անտառտնտեսության նախարար Ջուլի Քոլինզը հայտարարել է, որ նոր ֆինանսավորումը լրացում է ավելի քան 1 միլիարդ դոլարին, որը ծախսվել է երկրի կենսաանվտանգության ամրապնդման համար:

«Թռչնագրիպի այս շտամը իրական և էական վտանգ է ներկայացնում Ավստրալիայի գյուղատնտեսության համար», - ասվում է Քոլինզի հայտարարության մեջ: Չնայած նրան, որ տարածաշրջանը որոշակիորեն պաշտպանված է իր աշխարհագրական դիրքի շնորհիվ․ այն հեռու է խոշոր թռչունների միգրացիոն ուղիներից, ինչպիսիք են սագերը, որոնք տարածում են վարակը, սակայն վիրուսն արդեն մոտ է, 2022 թվականին հասել է Ինդոնեզիա, իսկ անցյալ տարի՝ Անտարկտիկա:

Գիտնականներն ու պաշտոնյաներն ասում են, որ ավելի մեծ վտանգ կա, որ այն Ավստրալիա կթափանցի  Հարավային կիսագնդի ավելի մանր չվող կտցարների հետ գարնանը՝ սեպտեմբեր-նոյեմբեր ամիսներին: Ավստրալիան այս տարվա սկզբին բախվեց թռչնագրիպի երեք զուգահեռ բռնկման հետ, սակայն դրանցից յուրաքանչյուրը ներառում էր վիրուսի տարբեր շտամեր, որոնցից ոչ մեկը H5N1 տիպի չէր:

«Այս տարի թռչնագրիպի բարձր ախտածին այլ շտամերի բռնկումների հետևանքներն ընդգծում է ազգային պատրաստվածության մեջ շարունակական ներդրումների կարևորությունը»,- նշել է Քոլինզը: