նախընտրելի դարձնել
Արժույթի միջազգային հիմնադրամը նոր կանխատեսմամբ հայտարարել է, որ Ուկրաինայում պատերազմը հավանաբար կշարունակվի մինչև 2026 թվականը։ Անցյալ տարի ռազմական գործողությունների շարունակությունը մինչև հաջորդ տարվա վերջ ենթադրվում էր բացասական սցենարով, ասված է հիմնադրամի կայքում զետեղված հաղորդագրության մեջ։
Այս տարվա վատագույն սցենարի դեպքում Արժույթի միջազգային հիմնադրամը ենթարում է, որ պատերազմը կավարտվի 2026 թվականի կեսին, իսկ Կիևի համար Արևմուտքի աջակցության և էներգետիկ անվտանգության հարցերում հիմնադրամը լուրջ ռիսկեր է նշում:
«Ուկրաինայում պատերազմը շարունակում է տնտեսական, սոցիալական և հումանիտար վնասներ պատճառել։ Էներգետիկ ենթակառուցվածքների վրա հարձակումները լուրջ տնտեսական վնաս և կորուստներ են պատճառել, իսկ կանխատեսումները մնում են խիստ անորոշ: Ակնկալվում է, որ պատերազմը կշարունակվի հաջորդ տարվա ընթացքում՝ ազդելով ծախսերի վրա և լրացուցիչ ֆինանսավորման կարիքներ ի հայտ բերելով»,-ասվում է փաստաթղթում:
Պատերազմն Ուկրաինայի իշխանություններին ստիպում է 2025 թվականի պաշտպանության բյուջեում ներառել ավելի շատ միջոցներ, քան ի սկզբանե նախատեսված էր։
Սոցիալական և տնտեսական լուրջ խնդիրները, ինչպես նաև ավելի կոշտ զորահավաքը արդեն իսկ հանգեցնում է երկրում աշխատուժի պակասի։ Արժույթի միջազգային հիմնադրամի գնահատմամբ՝ ավելի քան 10,3 միլիոն մարդ դեռևս տեղահանված է՝ ինչպես ներքին, այնպես էլ փախստականների շրջանում: Միաժամանակ պարենային անապահովությունը ազդում է բնակչության մեկ հինգերորդի վրա։
Հիմնադրամի կանխատեսումներով՝ հաջորդ տարի Ուկրաինայի պարտք-ՀՆԱ հարաբերակցությունը կարող է գերազանցել 100%-ը, իսկ մինչև 2029 թվականը, բացասական սցենարի դեպքում, հասնել գրեթե 300%-ի։
ԱՄՀ-ն միաժամանակ Ուկրաինայի ՀՆԱ-ի աճի կանխատեսումը 2025 թվականի համար նվազեցրել է մինչև 2,5%: Ընդ որում, մինչ պատերազմն այս ցուցանիշը կազմում էր 3,4%, իսկ այս տարի՝ 3%։ 2025-ին կանխատեսվում է, որ գնաճը կկազմի 9%, ինչը մոտ է նախապատերազմյան 9,4% մակարդակին:
ԱՄՀ-ն Ուկրաինայի իշխանություններին կոչ է արել աջակցել հարկային միջոցառումների փաթեթին, իսկ G7 երկրներին՝ Կիևին 50 միլիարդ դոլարի կայուն բազմամյա ֆինանսավորում տրամադրել։
