2000-ամյա հրաբխային բեկորների տակ թաղված Պոմպեյում հնագետները գտել են քաղաքում երբևէ հայտնաբերված ամենամեծ հռոմեական բաղնիքը, հայտնում է BBC-ն։

Պոմպեյի նախկինում չուսումնասիրված տարածքում գտնվող շքեղ բաղնիքը պատկանել է մի հարուստ քաղաքական գործչի, որը միջոցներ չի խնայել դրա կառուցման համար:

Բաղնիքը կարող է պարծենալ նրբագեղ ձևավորված հանդերձարաններով, ջերմաստիճանը կարգավորող  ջերմային սենյակներով և ջրավազանով: Նրա լավ պահպանված վիճակը ստիպել է հնագետներին այն անվանել «Պոմպեյի էֆեկտի» վառ օրինակ։

Բաղնիքի համալիրը, որն ավելի շատ նման է ժամանակակից սպա-կենտրոնի, քան պարզ սաունայի, շքեղ առանձնատան մի մասն է, որը, ենթադրաբար, պատկանել է Պոմպեյի ականավոր քաղաքական գործիչ Ավլուս Ռուստիուս Վերային:

Տպավորիչ տունը գտնվում էր լվացքատան և հացի փռի կողքին, ինչը թույլ է տալիս ենթադրելու, որ դրանք ևս պատկանել են Վերային: Սակայն սպա-կենտրոնն, անկասկած, նրա ամենաշքեղ ունեցվածքն էր, որով նա հյուրերին էր ցուցադրում իր հարստությունն ու իշխանությունը:

Սպա-սրահ այցելությունը սկսվում էր կալդարիումից՝ տաք սենյակից, որը բարձրացված հատակ ուներ, ինչը տաք օդի շրջանառության հնարավորություն էր տալիս՝ սաունայի էֆեկտ ստեղծելով: Այնուհետև հյուրերը տեղափոխվում էին տեպիդարիում, տաք սենյակ, որը զարդարված էր գունագեղ նկարներով, որտեղ նրանք յուղեր էին քսում իրենց մաշկին և այն քերում ստրիգիլի օգնությամբ: Վերջում նրանք հայտնվում էին ֆրիգիդարիումում, ամենաշքեղ սենյակում՝ կարմիր սյուներով և սառը ջրով լողավազանով, որը նախատեսված էր 20-30 հոգու համար։ Պատերը զարդարված էին մարզիկներին պատկերող որմնանկարներով։