նախընտրելի դարձնել
Պաղեստինյան ՀԱՄԱՍ խմբավորումը համաձայնել է Եգիպտոսի նոր առաջարկին՝ հրադադարի ռեժիմի վերսկսման դիմաց ազատ արձակել 5 իսրայելցի պատանդների, այդ թվում՝ ԱՄՆ և Իսրայելի քաղաքացիություն ունեցող Էդան Ալեքսանդերին, հայտնում է CNN-ը՝ հղում անելով ՀԱՄԱՍ-ի աղբյուրին։
Առաջարկը նման է մի քանի շաբաթ առաջ ԱՄՆ հատուկ բանագնաց Սթիվ Ուիտկոֆի ներկայացրած առաջարկին, թեև պարզ չէ՝ արդյոք այն ներառում է նաև զոհված պատանդների մարմինների հանձնումը:
Հինգ պատանդների ազատ արձակման դիմաց ՀԱՄԱՍ-ը ակնկալում է վերադարձ հրադադարի առաջին փուլի պայմաններին, ներառյալ հումանիտար օգնության առաքումը, ինչպես նաև համաձայնություն հրադադարի երկրորդ փուլի բանակցությունների շուրջ, ասել է աղբյուրը:
Հեռուստաուղերձում ՀԱՄԱՍ-ի առաջնորդ Խալիլ ալ Հայան հայտարարել է, որ զինյալ խմբավորումը ողջունել է առաջարկը:
Ալ-Հայան հավելել է, որ ՀԱՄԱՍ-ը «լիովին կատարում է» հրադադարի առաջին համաձայնագրի պայմանները, և հույս ունի, որ Իսրայելը չի խոչընդոտի այս առաջարկին։
Իսրայելը Եգիպտոսի առաջարկին պատասխանել է հակաառաջարկով, ասվում է Իսրայելի վարչապետի գրասենյակի հաղորդագրության մեջ։
«Վարչապետ Բենիամին Նաթանյահուն երեկ մի շարք խորհրդակցություններ է անցկացրել միջնորդներից ստացված առաջարկի վերաբերյալ: Վերջին ժամերին Իսրայելը միջնորդներին ներկայացրել է իր հակաառաջարկը՝ ԱՄՆ-ի հետ այն լիարժեք համաձայնեցնելով», - ասվում է Նաթանյահուի գրասենյակի հաղորդման մեջ:
Այս ամսվա սկզբին Իսրայելը վերսկսեց հարձակումները Գազայի վրա և շրջափակեց անկլավ մուտք գործող մարդասիրական օգնությունը՝ նախազգուշացնելով, որ իր ուժերը կպահպանեն մշտական ներկայությունը Գազայի հատվածներում մինչև մնացած 24 պատանդների ազատ արձակումը, որոնք, ենթադրաբար, դեռ ողջ են:
