նախընտրելի դարձնել
ԱՄՆ եւ Իտալիայի գիտնականների միջազգային խումբը ուղեղում հայտնաբերել է նեյրոնային շղթաներ, որոնք պատասխանատու են մարդու քաղաքական ներգրավվածության համար: Պարզվել է, որ որոշակի ոլորտների վնասումը կարող է մեծացնել կամ նվազեցնել մարդկանց քաղաքական գործունեությամբ զբաղվելու ցանկությունը։ Հետազոտությունը հրապարակվել է Brain գիտական ամսագրում։
Թիմը վերլուծել է Վիետնամի պատերազմի 124 վետերանների տվյալները՝ ուղեղի տրավմատիկ վնասվածքներով, համեմատելով նրանց վնասվածքներ չունեցող 35 վետերանների վերահսկիչ խմբի հետ: Մասնակիցները թեստեր են հանձնել՝ գնահատելով իրենց քաղաքական գործունեությունը, գաղափարախոսությունը եւ կուսակցական պատկանելությունը։
Պարզվել է, որ ձախ դորսոլատերակ ճակատամերձ կեղեւի եւ հետին նախասեպի կապերի վնասումը մեծացրել է քաղաքական ներգրավվածությունը: Նշաձեւ մարմնի եւ առաջնային քունքամասի վնասվածքները, ընդհակառակը, նվազեցրել են քաղաքականության նկատմամբ հետաքրքրությունը:
Սակայն վնասված գոտիներից ոչ մեկը չի ազդել քաղաքական համոզմունքների վրա, այդ ազդեցությունը եղել է միայն դրանց արտահայտման աստիճանի վրա։
Արդյունքները կարող են օգնել սոցիալական վարքագծի վրա ազդող գանգուղեղային տրավմատիկ վնասվածքներ ունեցող պացիենտների վերականգնմանը:
Ուսումնասիրությունը ցույց է տվել, որ քաղաքական ակտիվությունը կարող է կապված լինել նեյրոկենսաբանական մեխանիզմների եւ ոչ միայն դաստիարակության կամ միջավայրի հետ:
Ավելին, հայտնագործությունը հաստատել է, որ ուղեղային ցանցերը, որոնք պատասխանատու են հուզական վերահսկողության եւ կոգնիտիվ գործառույթների համար, առանցքային դեր են խաղում սոցիալական վարքագծում:
Գիտնականները նախատեսում են շարունակել իրենց հետազոտությունները՝ օգտագործելով տրանսկրանիալ մագնիսական խթանումը (ՏՄԽ)՝ ավելի ճշգրիտ որոշելու համար, թե ինչպես է ուղեղի որոշակի հատվածների վրա ազդեցությունը փոխում վարքը:
