Ֆինլանդիայի պաշտպանության նախարարության շենքի ճակատային մասը շաբաթ երեկոյան վարդագույն ներկով են ներկել, գրում է Ilta Sanomat պարբերականը։ Հելսինկիի ոստիկանության հրամանատարական կենտրոնից հայտնել են, որ ոստիկանությունը վնասի մասին տեղեկությունը ստացել է գիշերը՝ 01:42-ին:

Ilta-Sanomat-ի հրապարակած լուսանկարում շենքի գլխավոր մուտքը ներկի մեջ կորած է։

Ոստիկանությունից հայտնել են, որ դեպքի վայրում նկատել են երկու անձանց, որոնց կասկածում են վանդալիզմին մասնակցելու մեջ։ Կասկածյալների գտնվելու վայրը դեռևս չեն պարզել։

Անվտանգության աշխատակիցը ոստիկանությանը հայտնել է շենքին հասցված վնասի մասին։ Ոստիկանությունը ծանրացուցիչ հանգամանքներում վնասվածք հասցնելու փաստի առթիվ քրեական գործ է հարուցել։

Հիշեցնենք, որ անցյալ տարի ակտիվիստները սեպտեմբերին Հելսինկիում խորհրդարանի սյուների վրա կարմիր ներկ էին շփել՝ նման կերպ արտահայտելով տորֆի արդյունահանման դեմ բողոքը։