Եվրոպական արտաքին գործողությունների ծառայության (EEAS) նիստում ԵՄ դիվանագիտության ղեկավար Կայա Կալասը խոստովանել է, որ իր նախորդի՝ Ֆեդերիկա Մոգերինիի հետ կապված կոռուպցիոն սկանդալը ցնցել է եվրոպացի դիվանագետներին: Այս մասին տեղեկացրել է Euractiv-ը՝ հղում կատարելով աղբյուրներին:

Եվրոպական դատական ​​մարմինները նախկինում հետաքննություն էին սկսել ԵՄ դիվանագիտական ​​ծառայության նախկին ղեկավար եւ Եվրոպայի քոլեջի ռեկտոր Մոգերինիի դեմ՝ խարդախության եւ կոռուպցիայի մեղադրանքով:

«Սկանդալները ակնհայտորեն ցնցել են մեր ծառայությունը»,- կայքը մեջբերել է Կալասի խոսքերը:

Ըստ կայքի՝ Կալասի ելույթը տեւել է ընդամենը 30 րոպե եւ քիչ մանրամասներ է պարունակել: ԵՄ դիվանագիտական ​​ծառայության ղեկավարը պատասխանել է ընդամենը երեք հարցի՝ «կամավորների կոալիցիայի» նիստից առաջ:

Դեկտեմբերի 2-ին Եվրոպական հանձնաժողովը եւ Եվրոպական դատախազությունը հաստատել են խուզարկությունները Բրյուսելում Եվրոպական արտաքին գործողությունների ծառայության գլխավոր գրասենյակում, Բրյուգեի Եվրոպայի քոլեջում եւ մի քանի մասնավոր տներում, որոնց ընթացքում «ձերբակալվել են երեք անձինք»: Նրանք մեղադրվում են մրցութային խարդախության մեջ, այդ թվում՝ Եվրոպական արտաքին ծառայության կողմից Եվրոպայի քոլեջում երիտասարդ եվրոպացի դիվանագետների վերապատրաստման ծրագրի հայտի հետ կապված: Ձերբակալվածների թվում են Մոգերինին եւ ԵՄ արտաքին գործերի նախկին գլխավոր քարտուղար Ստեֆանո Սանինոն։

Իտալական լրատվամիջոցների տվյալներով՝ ձերբակալվածները ազատ են արձակվել, քանի որ «փախչելու վտանգ չկա»։ Սակայն, ինչպես տեղեկացրել է La Repubblica-ն, Բելգիայի քրեական ոստիկանության հարցաքննությունից հետո երեքին էլ պաշտոնապես մեղադրանք է առաջադրվել։ Մեղադրանքները վերաբերում են գնումների ոլորտում խարդախությանը եւ կոռուպցիային, շահերի բախմանը եւ մասնագիտական ​​գաղտնիքի հրապարակմանը։