նախընտրելի դարձնել
Ուրբաթ օրը ԱՄՆ զինված ուժերը լայնամասշտաբ հարվածներ են հասցրել Սիրիայում «Իսլամական պետության» (ԻՊ) տասնյակ օբյեկտների՝ ի պատասխան ամերիկյան անձնակազմի դեմ իրականացված հարձակման։ Այս մասին հայտնում է Reuters-ը՝ հղում անելով պաշտոնական անձանց։
Վերջին ամիսներին ԱՄՆ-ի գլխավորած կոալիցիան ավիահարվածներ է հասցնում և ցամաքային գործողություններ իրականացնում Սիրիայում՝ ահաբեկչության մեջ կասկածվող անձանց դեմ, հաճախ սիրիական անվտանգության ուժերի ներգրավմամբ։
ԱՄՆ նախագահ Դոնալդ Թրամփը խոստացել է պատասխան միջոցներ ձեռնարկել այն բանից հետո, երբ նախորդ հանգստյան օրերին Սիրիայում ԻՊ-ի ենթադրյալ հարձակման հետևանքով ամերիկացի զինծառայողներ են զոհվել։
Պաշտպանության նախարար Փիթ Հեգսեթը հայտարարել է, որ հարվածները հասցվել են «ԻՊ-ի գրոհայիններին, ենթակառուցվածքային օբյեկտներին և զենքի պահեստներին», և որ գործողությունը կրել է «ԲԱԶԵԻ ԱՉՔԻ ՀԱՐՎԱԾ» անվանումը։
«Սա պատերազմի սկիզբ չէ, սա վրեժխնդրության հայտարարություն է», — ասել է Հեգսեթը: «Այսօր մենք հետապնդել և ոչնչացրել ենք մեր թշնամիներին: Նրանցից շատերին: Եվ մենք շարունակելու ենք դա»:
Թրամփը սոցիալական ցանցերում հայտարարել է, որ Սիրիայի կառավարությունը լիովին աջակցել է հարվածներին և որ ԱՄՆ-ն «շատ լուրջ՝ պատասխան հարված» է հասցրել:
ԱՄՆ Կենտրոնական հրամանատարությունը նշել է, որ հարվածները հասցվել են Կենտրոնական Սիրիայի ավելի քան 70 թիրախների՝ հավելելով, որ գործողությանն աջակցել են հորդանանյան կործանիչները:
Ամերիկացի պաշտոնյաներից մեկը հայտնել է, որ հարվածներն իրականացվել են ամերիկյան F-15 և A-10 կործանիչների, ինչպես նաև Apache ուղղաթիռների և HIMARS հրթիռային համակարգերի միջոցով:
Սիրիան հաստատել է ԻՊ-ի դեմ պայքարին իր հաստատակամ հանձնառությունը և այն բանի ապահովմանը, որ կազմակերպությունը «սիրիական տարածքում անվտանգ ապաստարաններ չունենա», ասված է արտաքին գործերի նախարարության հայտարարության մեջ:
Ամերիկյան զինվորականների տվյալներով՝ շաբաթ օրը Սիրիայի կենտրոնական Պալմիրա քաղաքում ԱՄՆ բանակի երկու զինվոր և մի քաղաքացիական թարգմանիչ են սպանվել հարձակվողի կողմից, ով գրոհել էր ամերիկյան և սիրիական զինծառայողների շարասյունը, ինչից հետո գնդակահարվել էր: Հարձակման հետևանքով ևս երեք ամերիկացի զինվորներ են վիրավորվել:
Սիրիայում շարունակում են մնալ շուրջ 1000 ամերիկացի զինծառայողներ: Սիրիայի ներքին գործերի նախարարությունը հարձակվողին որակել է որպես սիրիական անվտանգության ուժերի աշխատակից, ով կասկածվում է ԻՊ-ի նկատմամբ համակրանք ունենալու մեջ: Սիրիան համագործակցում է ԱՄՆ-ի գլխավորած հակաահաբեկչական կոալիցիայի հետ՝ համաձայնության գալով անցյալ ամիս, երբ Սիրիայի նախագահ Ահմեդ ալ-Շարաան այցելել էր Սպիտակ տուն:
