Նոր հետազոտությունը, որն իրականացրել են Kinsey Institute-ի մասնագետները,  լույս է սփռում այն բանի վրա, թե որքան հաճախ են մարդիկ կրքոտ սիրահարվում կյանքի ընթացքում, սիրահարվածություն, որի մասին պոետները, ֆիլմերն ու երգերը խոսում են որպես աշխարհի ամենագլխավոր զգացում։ Արդյունքներն այնքան էլ ռոմանտիկական չէին, քան սպասում էին շատերը. միջին վիճակագրական չափահաս մարդը տեղեկացրել է, որ նման սիրային բռնկում ունեցել է մոտավորապես երկու անգամ ողջ կյանքի ընթացքում, գրել է Daily Mail-ը։

Հետազոտությանը մասնակցել է 18-99 տարեկան ավելի քան 10 հազար միայնակ չափահաս մարդ, որոնց ուղիղ հարցրել են. «Քանի՞ անգամ եք ձեր կյանքում կրքոտ սիրահարվել»։

Վերլուծությունը ցույց է տվել, որ մոտ 14 տոկոսը երբեք նման զգացում չի ունեցել, մոտ 28 տոկոսը խոսել է մեկ անգամվա մասին, իսկ ամենատարածված պատասխանը՝ 30 տոկոս, եղել է՝ երկու անգամ։ Մոտ 17 տոկոսը խոստովանել է երեք սիրահարվածության մասին, մոտ 11 տոկոսը նշել է, որ կրքոտ սիրահարված է եղել չորս եւ ավելի անգամ։

Հետազոտության հեղինակներն ընդգծել են, որ «կրքոտ սերը» չի նշանակում պարզապես համակրանք կամ բարեկամություն, այլ որպես ինտենսիվ հուզական եւ ֆիզիկական ձգողականություն, որը հեշտ նկատվում եւ հիշվում է ողջ կյանքում։ Այս դրվագները, նրանց կարծիքով, տեղի են ունենում ավելի հազվադեպ, քան ռոմանտիկական ֆիլմերում կամ սոցցանցերում է ընդունված մտածել, բայց եւ բավական հաճախ, որպեսզի չափահաս մարդկանց մեծ մասը գոնե մեկ անգամ զգացած լինի դրանք։

Հայտնաբերվել է նաեւ, որ տարիքը փոքր-ինչ կապված է նման զգացումների թվաքանակի հետ. տարեց մասնակիցներն ընդհանուր առմամբ տեղեկացրել են ավելի մեծ թվով կրքոտ սիրահարվածությունների մասին, քան երիտասարդները, ինչը տրամաբանական է, քանի որ նրանք ավելի մեծ կենսական հնարավորություններ ունեն հանդիպելու տարբեր մարդկանց։ Սակայն ընդհանուր պատկերը մնում է նույնը. «միակ սերը ողջ կյանքի համար» ավելի շուտ բացառություն է, քան կանոն։

Այս եզրահանգումները օգնում են հասկանալ, որ ռոմանտիկական սերը բարդ եւ հազվադեպ երեւույթ է, որը միշտ չէ, որ համընկնում է նրա մասին մշակութային պատկերացումների հետ։ Դրանք նաեւ առիթ են տալիս նայելու սեփական հարաբերություններին ավելի իրատեսական դիրքերից՝ ընդունելով, որ խոր զգացումը կարող է միակը չլինել, բայց անպայման կրկնվելու է անվերջ։