Նախընտրելի
Բրիտանացի եւ ֆրանսիացի դեսանտայիններն ավարտել են Ուկրաինայում հնարավոր տեղակայման վերջնական նախապատրաստական աշխատանքները խաղաղապահ առաքելության շրջանակում, The Telegraph-ին հայտնել է պաշտպանության աղբյուրը: Նրա տվյալներով՝ Մեծ Բրիտանիայի 16-րդ օդային գրոհային բրիգադի ավելի քան 600 զինվորներ օդադեսանտային վարժանքներ են անցկացրել Ֆրանսիայի հյուսիս-արեւմուտքում՝ Բրետանում, ֆրանսիական 11-րդ պարաշուտային բրիգադի հետ միասին: Նրանք փորձարկել են օդադեսանտային ռմբակոծություն «Օրիոն» զորավարժությունների շրջանակում, որոնք տեղի են ունենում փետրվարի 24-ից մարտի 3-ը: «Այս տղաները սովորական բանակի նիզակի սայրն են: Նրանք ամենապատրաստ մարդիկ են եւ կարող են անել ամեն ինչ»,- The Telegraph-ին ասել է աղբյուրը:
Մինչ այդ Մեծ Բրիտանիայի վարչապետ Քիր Սթարմերը հայտնել էր, որ Լոնդոնը եւ Փարիզը պատրաստ են գլխավորել խաղաղապահ ուժերը, եթե Մոսկվայի եւ Կիեւի միջեւ կնքվի հրադադար: Ուկրաինայի նախագահ Վլադիմիր Զելենսկին հայտնել է, որ Մեծ Բրիտանիան եւ Ֆրանսիան պարտավորվել են Ուկրաինա ուղարկել 5 հազարական զինվոր՝ անվտանգության երաշխիքների շրջանակում: Telegraph-ը նաեւ նշել է, որ «հարցեր են առաջանում» Մեծ Բրիտանիայի՝ նման մարտական ուժեր տեղակայելու կարողության վերաբերյալ, քանի որ երկրի բանակը կրճատվել է՝ հասնելովւ 200 տարվա ընթացքում իր ամենացածր թվաքանակին՝ 70 հազար զինվոր։ Հետեւաբար, Ուկրաինա լիովին զինված զորքեր ուղարկելու համար Լոնդոնը պետք է դուրս բերի զորքերը Էստոնիայից եւ Կիպրոսից։
Ավելի վաղ Մեծ Բրիտանիան ստեղծել էր 70 հոգանոց շտաբ՝ Ուկրաինայում տեղակայվելիք բազմազգ ուժերի ստեղծման շրջանակում: Շտաբի բյուջեն կազմել է 200 միլիոն ֆունտ սթեռլինգ (269.7 միլիոն դոլար): «Այս ֆինանսավորումը թույլ կտա բրիտանական զորքերին ապահովել Ուկրաինայի ապագան եւ ամրապնդել երկարաժամկետ անվտանգության երաշխիքները՝ Մեծ Բրիտանիայի, Ֆրանսիայի եւ Ուկրաինայի առաջնորդների կողմից Փարիզում ստորագրված մտադրությունների մասին հռչակագրի համաձայն»,- մինչ այդ նշել էին Մեծ Բրիտանիայի պաշտպանության նախարարությունում։
Լոնդոնն աշխատում է Ուկրաինա զորքերի հնարավոր տեղակայման ուղղությամբ՝ դաշնակիցների հետ միասին, «կամավորների կոալիցիայի» շրջանակում: Մեծ Բրիտանիայի վարչապետ Սթարմերը հայտնել է դրա ստեղծման մասին 2025թ․ մարտի սկզբին: Միեւնույն ժամանակ, ըստ The Telegraph-ին հայտնի ռազմական եւ դիվանագիտական աղբյուրների, կոալիցիայի երկրների ներկայացուցիչներն ընդունել են, որ Ուկրաինա խաղաղապահներ տեղակայելու ծրագրերը կպահանջեն Ռուսաստանի նախագահ Վլադիմիր Պուտինի հավանությունը: Արդյունքում՝ նրանց խոսքով, հնարավոր հրադադարի պահպանումն ապահովելու ծրագիրը կարող է խափանվել Կրեմլի կողմից: Կոալիցիան ներառում է ընդհանուր առմամբ 26 երկիր, այդ թվում՝ ԵՄ անդամ երկրներ, Թուրքիան, Նորվեգիան եւ Իսլանդիան:
