Վրաստանում Հայաստանի դեսպան, աշխարհահռչակ ծանրամարտիկ Յուրի Վարդանյանի որդու փաստաբան Վահան Հայրապետյանը չի բողոքարկելու Սյունիքի մարզի ընդհանուր իրավասության դատարանի՝ սեպտեմբերի 4-ին կայացրած վճիռը, որով Դավիթ Վարդանյանը մեղավոր ճանաչեց թմրանյութերի մաքսանենգության մեջ եւ դատապարտեց 4 տարի 6 ամիս ժամկետով ազատազրկման:

«Որոշել եմ չբողոքարկել առաջին ատյանի կայացրած որոշումը, պատճառը չեմ ասի, իմ ցանկությունն է»,- NEWS.am-ի հետ զրույցում ասաց փաստաբանը:

Նրա խոսքով՝ Դավիթ Վարդանյանն այս պահին գտնվում է «Գորիս» քրեակատարողական հիմնարկի մեկուսարանում, դատարանի օրինական պահանջը դեռ ուժի մեջ չի մտել եւ հայտնի չէ, թե վերջինս որտեղ է կրելու պատիժը:

Նշենք, որ ավելի վաղ NEWS.am-ի հետ զրույցում Վահան Հայրապետյանը հայտարարել էր, որ համաձայն չէ պատժի հետ եւ անպայման բողոքարկելու է Վերաքննիչ դատարան: 

Հիշեցնենք, որ 30-ամյա Դավիթ Վարդանյանին մեղադրանք էր առաջադրվել այն բանի համար, որ 2013թ. հոկտեմբերին Իրանում առանց իրացնելու նպատակի ձեռք է բերել առանձնապես խոշոր չափերի`ընդհանուր 106 գրամ կշռով հաշիշ տեսակի թմրամիջոց, որից 7.0 գրամ կշռով թմրամիջոցը փաթաթել է ռետինե մատնոցների մեջ ու կուլ տվել, մնացածը պահել ձեռքի պայուսակում և մաքսանենգ ճանապարհով ՀՀ պետական սահմանի Մեղրիի անցակետով թմրամիջոցն ապօրինի տեղափոխել է Հայաստան: Նշենք, որ Դավիթ Վարդանյանը ՀՀ քրեական օրենսգրքի 215-րդ հոդվածի 2-րդ մասով դատապարտվեց ազատազրկման` 4 տարի ժամկետով, գույքի բռնագրավմամբ, եւ 268-րդ հոդվածի 3-րդ մասով` 2 տարի 6 ամիս ժամկետով: ՀՀ քրեական օրենսգրքի 66 հոդվածի 4-րդ մասի համաձայն` հանցանքների համակցությամբ նշանակված պատիժների մասնակիորեն գումարելու միջոցով վերջնական պատիժ նշանակվեց 4 տարի 6 ամիս ազատազրկումը` հաշվի առնելով նաեւ անազատության մեջ գտնվելու ժամանակահատվածը։