Արմավիրի մարզում Այգեշատ գյուղում ավազակային հարձակում իրականացնողները, ամենայն հավանականությամբ, ճանաչել են այդ ընտանիքին: Այս մասին NEWS.am-ի թղթակցի հետ զրույցում ասաց Այգեշատի գյուղապետ Ռոբերտ Հովսեփյանը:
Նա նշեց, որ տանտերերը գտնվում են ՌԴ-ում, նրա դուստրը իր ընտանիքի հետ ժամանակավոր եկել եւ բնակվում էր Այգեշատի իրենց տանը, երբ դեպքը տեղի ունեցավ: «Փեսան գնացել էր օդանավակայան՝ դիմավորելու ՌԴ-ից վերադարձող զոքանչին եւ աներոջը, երբ դեպքը եղավ: Հենց փեսան տնից դուրս եկավ, 10 րոպե հետո մտել են տուն, թռել են դարպասի վրայով եւ մտել, աղջիկը ձայն է լսել, գնացել է, որ դուռը փակի, էդպես եղել է դեպքը: Կապկպում են աղջկան, ծեծում, թե փողերի, ոսկու տեղն ասա, 1 տարեկան երեխա ունեն, դանակ են քաշում երեխայի վրա, թե կմորթենք աչքիդ դիմաց, փողերի տեղը ասա, էդ աղջիկն էլ ասում է ոսկեղենի տեղը՝ նշելով, որ փող չունեն, մոտը 5000 դրամ կա, կարող են տանել, բայց գողերին թվում է, թե սուտ է ասում, աղջիկն էլ թե եթե ունենք, փնտրեք, տարեք»,-ասաց գյուղապտեը:
Նա նշեց, որ երեխային որեւէ վնաս չեն հասցրել, աղջկան են հարվածել, քթից արյուն էր եկել, հիմա վիճակը լավ է: Երեխան պատմել է, որ երբ իր հետ խոսում էին, հայացքը փախցնում էին, այդտեղից էլ եզրակացնում են, որ ծանոթ մարդ է եղել եւ իմացել է, որ այդ ժամին ամուսինը տանը չի լինելու:
Գյուղապետն ասաց, որ ընտանիքը ապրում է նորմալ սոցիալական պայմաններում, զբաղվում են գյուղատնտեսական աշխատանքներով, դիմակավորված 2 անձինք գողացել են մոտ 500 հազար դրամի ոսկեղեն: Ռոբերտ Հովսեփյանը վստահ է, որ շուտով հայտնաբերելու են ավազակային հարձակում իրականացնողներին, քանի որ մատնահետքերը վերցրել են:
Ավելի վաղ NEWS.am-ը հայտնել էր, որ Արմավիրի մարզի Այգեշատ գյուղում ավազակային հարձակում է տեղի ունեցել: NEWS.am-ին հայտնի է դարձել, որ դիմակավորված, զինված անձինք այսօր կեսգիշերին ներխուժել են գյուղի տներից մեկը, որտեղ տանտիրուհին մենակ է եղել: 23- տարեկան կնոջը կապկպել են ծեծի ենթարկել, այնուհետեւ դանակի սպառնալիքով պահանջել գումար: Կինը ստիպված նրանց ցույց է տվել գումարի եւ ոսկյա զարդերի տեղը, որոնք վերցնելով` դիմել են փախուստի: Հանցագործները դեռ չեն հայտնաբերվել: