Բացառված չէ, որ ռուսական փայլաթիթեղի եվրոպացի պատվիրատուների մի մասին կմատակարարվի «Արմենալ» գործարանի արտադրանքը։ Այս մասին հուլիսի 6-ին կայացած մամուլի ասուլիսի ժամանակ հայտարարել է «Ռուսալ» ԲԲԸ փաթեթավորման դիվիզիոնի տնօրեն Սերգեյ Գորյաչեւը՝ պատասխանելով Եվրամիությանը հակադեմփինգային տուրքով փայլաթիթեղ մատակարարելու մասին հարցին։
«Եվրոպան մեզ համար փակ չէ։ Մենք ունենք «Արմենալը», որտեղ մենք արտադրության ծավալները մեծացրել ենք մինչեւ 5 հազար տոննա։ Այս տարի մենք կմոտենանք 33 հազար տոննային։ Վերջին 4 տարվա ընթացքում մեծ աշխատանք է տարվել թերությունները շտկելու համար։ Դա լիարժեք լավ ձեռնարկություն է, որը ծածկում է Եվրոպայում մեր վաճառքի բոլոր պլանները»,- նշեց Գորյաչեւը։
Հիշեցնենք, որ հուլիսի 3-ին ԵՄ-ն հակադեմփինգային տուրք էր սահմանել ռուսական «Ռուսալ» ալյումինի կոնցեռնի համար, որը սակայն չի վերաբերում Հայաստանում նրա դուստր ձեռնարկությանը՝ «Արմենալին»։