Մոսկվայում կայացել է Եվրասիական տնտեսական հանձնաժողովի հերթական նիստը, որին ներկա են եղել ԵՏՀ Խորհրդի անդամները։ Հայկական կողմից նիստին մասնակցել է ՀՀ միջազգային տնտեսական ինտեգրացիայի եւ բարեփոխումների նախարար, փոխվարչապետ Վաչե Գաբրիելյանը։ Ինչպես NEWS.am-ը տեղեկանում է ԵՏՀ մամուլի ծառայությունից, նիստի ընթացքում քննարկվել են մաքսային կարգավորման, արդյունաբերության եւ առեւտրի ոլորտների մի շարք հարցեր։
Մասնավորապես ԵՏՀ խորհուրդը հաստատել է հարցերի ցուցակը, որոնցով ԵՏՀ կոլեգիան խորհրդատվություններ է անցկացնելու ԵՏՄ մաքսային սահմանը վերահսկող մարմինների համագործակցության հանձնաժողովի հետ։ ԵՏՀ խորհուրդը որոշել է նաեւ ստեղծել աշխատանքային խումբ, որի նպատակն է լինելու ԵՏՄ մաքսային տարածքում մշակել արտաքին տնտեսական գործունեության մասնակիցների նույնականացման միասնական համակարգ։ Համակարգը էլեկտրոնային փաստաշրջանառության ենթակառուցվածքի ձեւավորման պարտադիր պայմաններից մեկն է, որը միջգերատեսչական եւ միջպետական համագործակցության պարագայում մատակարարումների շղթայում ապահովում է բիզնես գործընթացը։