«Անի» հայկական հետազոտական կենտրոնի հրապարակած «Կազանյան փաստաթուղթ» կոչվող փաստաթուղթը փորձագիտական աշխատանքի արդյունք է: Այս մասին NEWS.am-ի թղթակցի հետ զրույցում հայտարարել է ԱԳՆ մամուլի քարտուղար Տիգրան Բալայանը՝ անդրադառնալով այն հարցին, թե հրապարակված տարբերակը համապատասխանո՞ւմ է իրականությանը, թե՞ ոչ:
Հիշեցնենք, որ «Անի» հայկական հետազոտական կենտրոնի փորձագետ Թաթուլ Հակոբյանի հրապարակման համաձայն՝ «Կազանյան փաստաթղթում», մասնավորապես, նկատի է առնվում հետեւյալը. «Լեռնային Ղարաբաղի շրջակա բոլոր տարածքները, որոնք գտնվում են հայկական վերահսկողության տակ, փոխանցվում են Ադրբեջանի հսկողությանը: Տարածքների փոխանցման մանրամասները կողմերը կհամաձայնեցեն Խաղաղության համաձայնագրով: Առաջին փուլում կփոխանցվեն Ակնը (Աղդամ), Վարանդան (Ֆիզուլի), Ջրականը (Ջեբրայիլ), Կովսականը (Զանգելան) եւ Սանասարը (Կուբաթլի): Հետագայում ադրբեջանական կողմին կփոխանցվեն Քարվաճառը (Քելբաջար) եւ Բերձորը (Լաչին), որոնք չեն գտնվում Հայաստանը եւ Լեռնային Ղարաբաղը կապող միջանցքում»: