ՆախընտրելիՌԴ-ում այսօր՝ դեկտեմբերի 26-ին վթարի հետեւանքով մահացած երեք հայերը արտագնա աշխատանքից Հայաստան էին վերադառնում՝ Ամանորն իրենց ընտանիքների հետ նշելու համար: Այս մասին NEWS.am-ին հայտնեցին մահացածներից մեկի հարազատները:
Մահացածներից 45-ամյա Ստեփան Կոստանյանը եւ 25-ամյա Սարգիս Խաչատրյանը Կոտայքի մարզի Աբովյան քաղաքից են: Ստեփան Կոստանյանը մեկ դուստր ու մեկ որդի ունի՝ 20 եւ 17 տարեկան: Սարգիս Խաչատրյանն ամուսնացած չէ: 30-ամյա Էդգար Պետրոսյանը Չարենցավան քաղաքից է: Վթարի հետեւանքով վիրավորված Մարկոս Պապյանը նույնպես Աբովյանից է: Մահացածները բոլորը եղել են «ՎԱԶ-2114» մակնիշի ավտոմեքենայի մեջ, որը վարել է Մարկոս Պապյանը:
Մահացածների ու Մարկոս Պապյանի հարազատները մեկնել են ՌԴ:
Ավելի վաղ NEWS.am-ը հայտնել էր, որ դեկտեմբերի 26-ին՝ ժամը 06.49-ին, ՌԴ ԱԻՆ ՃԿԱԿ-ից տեղեկություն է ստացվել, որ ժամը 01.51-ին Դոնի-Ռոստովի տարածաշրջանի Սալսկ-Պրոլետարսկ տեղական նշանակության ավտոճանապարհի 0.5 կմ-ին՝ Մանիչստրոյ գյուղի (բնակավայրի) մոտակայքում, տեղի է ունեցել ավտովթար:
Դեռեւս չբացահայտված հանգամանքներում բախվել են «ՎԱԶ-2114» մակնիշի т377ЕЦ61 եւ м599ЦМ57 համարանիշների եւ «Մազդա» մակնիշի х181МО61 համարանիշի ավտոմեքենաները:
Վթարի հետեւանքով 3 ՀՀ քաղաքացի է զոհվել, մեկը՝ վիրավորվել: Մարկոս Պապյանը ձախ ազդրի կոտրվածքով հոսպիտալացվել է Սալսկայի կենտրոնական հիվանդանոցի վնասվածքաբանության բաժանմունք: Նրա վիճակը միջին ծանրության է:
