Հիվանդանոց տեղափոխվելիս 19-ամյա Ռոլանդ Սահակյանի՝ ողջ մնալու հնարավորությունը, մեղմ ասած, մեծ չէր. փորձելով ծնողներին նախապատրաստել վատագույնին՝ մասնագետներն առավելագույնը 10% հավանականության մասին էին խոսում: Բայց ապրիլյան պատերազմի ժամանակ Մատաղիսում բազմաթիվ բեկորային վիրավորում ստացած Ռոլանդն այսօր աստիճանաբար կազդուրվում է:
Ռոլանդի հայրը՝ Քաջիկ Սահակյանը, NEWS.am-ի թղթակցի հետ զրույցում պատմեց, որ հոսպիտալում գտնվելու երկու ամիսների ընթացքում երիտասարդը 6 վիրահատության է ենթարկվել. երկու թոքերի, լեղապարկի, լյարդի, 12-մատնյա աղիքի եւ ողնաշարի: Ռոլանդի վիճակը հիմա էլ ծանր է, բայց բժիշկներին, ինչպես հարազատներն են վստահեցնում, հաջողվեց փրկել նրա կյանքը եւ բառացիորեն հետ բերել այն աշխարհից: Ռոլանդի հոր խոսքով՝ ե՛ւ բժիշկները, ե՛ւ բուժքույրերը երիտասարդին սեփական որդու պես են վերաբերվում:
Այսօր Ռոլանդն արդեն կարողանում է ինքնուրույն ուտել: Իհարկե, նա մինչեւ հիմա բարձր ջերմություն ունի, սակայն ձեռքերը նորմալ աշխատում են. ողնաշարի վնասվածքը դրանց վրա չի ազդել: Բայց դեռ հայտնի չէ, արդյո՞ք նա կկարողանա քայլել: Արդեն մեկ շաբաթ է՝ Ռոլանդին մկանները մերսող մասնագետ է այցելում, որոնք երկար ժամանակ պառկելու արդյունքում թուլանում են եւ կորցնում տոնուսը:
Հիշեցնենք, որ Կենտրոնական զինվորական հոսպիտալի ղեկավար Արամ Ասատուրյանն ավելի վաղ NEWS.am-ի թղթակցին պատմել էր, որ բանակցություններ են վարում՝ Ռոլանդ Սահակյանի եւ Ավետիս Զարգարյանի բուժումն արտերկրում շարունակելու շուրջ: Վերջինը նույնպես ներկայում հոսպիտալի վերակենդանացման բաժանմունքում է: Սակայն որեւէ մանրամասն առայժմ հայտնի չէ:
Հիշեցնենք նաեւ, որ վերջերս Հայաստանի կառավարությունը որոշում ընդունեց այն մասին, որ այն վիրավորները, որոնց Հայաստանում չեն կարողանում անհրաժեշտ օգնություն ցուցաբերել, պետության միջոցների հաշվին կտեղափոխվեն արտերկիր՝ բուժման: Սակայն մինչ օրս այդ որոշումը չի կիրառվել:
