Երեւանի կենտրոնական զինվորական հոսպիտալում Ավետիս Զարգարյանն ու Ռոլանդ Սահակյանը, որոնք ողնաշարի ծանր վնասվածք են ստացել ադրբեջանական ագրեսիայի հետեւանքով, առաջիկայում հնարավոր է՝ տեղափոխվեն արտերկիր բուժման:
«Հարցը քննարկվում է, բանակցություններ են ընթանում. առողջապահության եւ պաշտպանության նախարարները, ռազմաբժշկական վարչության պետն արտասահմանյան կլինիկաների հետ քննարկում են, թե որտեղ ուղարկեն բուժման»,- NEWS.am-ի թղթակցի հետ զրույցում ասաց հոսպիտալի պետ Արամ Ասատուրյանը:
Նշենք, որ այս երկու զինծառայողների մասին առաջինը խոսել էր Երեւանի ավագանու «Բարեւ Երեւան» դաշինքի անդամ Անահիտ Բախշյանը՝ նշելով, որ այս երկու զինծառայողները հասարակության ուշադրության կարիքն ունեն:
Հիշեցնենք, որ հոսպիտալում է գտնվում նաեւ Հովհաննես Պողոսյանը, որը երկու անգամ վիրավորվել է: Առաջին անգամ վիրավորումը թեթեւ է եղել, եւ նա, չսպասելով լիարժեք առողջանալուն, դիրքեր է վերադարձել: Իսկ երկրորդ անգամ գլխի շրջանում հրազենային վիրավորում է ստացել: Մարտակերտի հոսպիտալում վիրահատելուց հետո նրան Ստեփանակերտ են տեղափոխել, այնտեղից էլ՝ Երեւան: Վերջին տվյալներով, երիտասարդը երկու վիրահատության է ենթարկվել, կոմայից արդեն դուրս է եկել, վիճակը կայունացել է:
Ավելի վաղ հայտնել էինք, որ Ղարաբաղյան հակամարտության հետեւանքով վիրավորված զինծառայողներից Արման Լազգիյանն արդեն մեկնել է Գերմանիա՝ բուժման: Առաջիկա օրերին արտերկիր կմեկնի նաեւ Ռուբեն Առաքելյանը: Այս զինծառայողները բուժման են մեկնել բարեգործությունների միջոցով, թեեւ ըստ Կառավարության որոշման՝ նմանատիպ զինծառայողների բուժման ծախսերը պետք է որ հոգար պետությունը:
Դեռեւս պարզ չէ՝ Ավետիս Զարգարյանի ու Ռոլանդ Սահակյանի բուժման ծախսերն ով է հոգալու, եթե որոշվի նրանց արտասահման տեղափոխել: