Նախօրեին Հրազդանում ջրանցքն ընկնելու հետեւանքով մահացած 9-ամյա տղան՝ Նարեկ Գալստյանը, Հրազդանի Միկրոշրջան թաղամասից էր:
Նարեկի ընտանիքն ապրում է սոցիալապես ծանր պայմաններում. նրանց ընտանեկան խնդիրներին NEWS.am-ն անդրադարձել էր տարիներ առաջ:
Նարեկը տան միակ տղան էր, երեխաներից մեծը: Բացի նրանից, ընտանիքում եւս երեք աղջիկներ կան: Մայրը՝ Քրիստինեն, այժմ սպասում է 5-րդ երեխային:
Նարեկի ծնողները մանկատան սաներ են եղել: Հետո ամուսնացել են եւ տեղափոխվել՝ ապրելու Հրազդան քաղաք:
Հիշեցնենք, որ Նարեկի մայրը՝ Քրիստինեն, օրվա հացը վաստակում էր Միկրոշրջանի շուկայում մաքրություն անելով: Ամուսինը մեկնել էր արտագնա աշխատանքի: Այժմ երկրից դուրս է, վաղը պիտի վերադառնա:
Մահացած երեխայի մայրն այսօր Կոտայքի մարզպետարան էր գնացել եւ դիմում գրել երեխայի հուղարկավորության ծախսերը հոգալու համար: NEWS.am-ի հետ զրույցում մայրը նշել է, որ հնարավորություն չունեն անգամ տարրական հարցերը լուծելու:
Նա պատմել է նաեւ կատարվածի մասին. «Ես չեմ իմացել, որ գնում են կանալ էրեխեքը: Եկան ինձ ասացին՝ ուզում ենք քեֆ անենք, ասեցի՝ շենքի հայաթում կանեք: Ու ես գնացի փարոսը ստացա, պարտքերս բաժանեցի, նորից նիսյա առեւտուր արեցի, իջա տուն, տեսա Նարեկը հայաթում չի: Հարցուփորձ եմ արել, բայց ոչ մեկ բան չէր ասում: Ավելի ուշ, դեռ երեխուն ման էի գալիս, իմացա, որ խեղդվելա»:
Քրիստինեի հարակից շենքերի բնակիչները ցավով էին խոսում տղայի մահվան մասին: Նրան ճանաչողները նշում էին, որ շատ խելոք, համեստ երեխա էր: Նաեւ հայտնում էին, որ տղան մշտապես մոր կողքին է եղել ու մոր հետ էր կապված:
Թե ինչպես է առանց մոր գիտության գնացել լողանալու, չեն հասկանում. «Շուկայի առեւտրականները Նարեկին շատ էին սիրում, կերակրում էին, երբ մայրն աշխատում էր, դասերն էին սովորացնում: Ինքն արյունով երեխա էր, ափսոս էր, գնաց, կորավ»,-պատմում էին Նարեկին ճանաչողները:
Ավելի վաղ NEWS.am-ը գրել էր, որ հունիսի 24-ին, ժամը 15:51-ին «911» ծառայությանն ահազանգ է ստացվել, որ Կոտայքի մարզի Հրազդան քաղաքի Վանատուր թաղամասի օղակաձեւ խաչմերուկի մոտակայքում 9 տարեկան երեխան ընկել է ջրանցքը։
Դեպքի վայր է մեկնել ԱԻՆ ՓԾ հրշեջ-փրկարարական ջոկատից երկու օպերատիվ խումբ եւ Սեւան քաղաքի հատուկ ջրափրկարարական ջոկատը:
«Փրկարարները «Հրազդան» ՀԷԿ-ի թիվ 3 ջրանցքում՝ ընկած վայրից մոտ 2 կմ հեռավորության վրա, հայտնաբերել են Ն.Գ.-ի (ծնված 2009 թ.) դին, դուրս բերել եւ մոտեցրել շտապօգնության ավտոմեքենային»:
