Նյու Յորքի քաղաքային խորհուրդը հավանություն է տվել օրինագծին, որի համաձայն՝ հասարակական սննդի ձեռնարկություններին արգելվում է ֆուա-գրա եւ այլ կերակրատեսակներ վաճառել, որոնց պատրաստման համար թռչուններին հարկադրաբար կերակրում են, հաղորդում է «ՌԻԱ Նովոստի»-ն:
Չորեքշաբթի Նյու Յորքի քաղաքային խորհրդի 46 անդամներ քվեարկել են «Տնային թռչունների հարկադրաբար կերակրումից ստացված արտադրանքի վաճառքի արգելքի մասին» օրինագծի ընդունման օգտին: Դեմ է քվեարկել 6 անդամ:
Ըստ օրինագծի տեքստի՝ «հասարակական սննդի որեւէ ձեռնարկություն կամ մանրածախ սննդի հիմնարկություն չպետք է նման արտադրանք պահպանի կամ վաճառի»:
Օրինագծում նշվում է, որ ֆուա-գրա նշմամբ մթերքները հարկադրաբար կերակրման մթերք կհամարվեն, քանի դեռ չի ապացուցվել հակառակը:
Նշվում է, որ խախտման դեպքում նախատեսվում է 500-2000 դոլարի չափով տուգանք սահմանել:
Ֆուա-գրան (ֆրանսերենից թարգմանաբար՝ «ճարպոտ լյարդ») ֆրանսիական կերակրատեսակ է, որը պատրաստվում է բադերի եւ սագերի ճարպոտ լյարդից թռչունների հարկադրաբար կերակրման հատուկ եղանակով:
