Իսպանիայի պատվավոր թագավոր Խուան Կառլոսի նախկին սիրուհին հայց է ներկայացրել բրիտանական դատարան՝ մեղադրելով նրան հետապնդման մեջ, հայտնում է AP-ն:
Իսպանիայի նախկին թագավորի հետ երկար հարաբերություններ ունեցած դանիա-գերմանացի գործարար Կորինա Լարսենին ներկայացնող հասարակայնության հետ կապերի ընկերությունը հաստատել է, որ դիմել է Լոնդոնի դատարան՝ կնոջ ենթադրյալ հետապնդման համար Խուան Կառլոսի նկատմամբ խափանման միջոց կիրառելու եւ փոխհատուցում ստանալու նպատակով:
Շվեյցարական դատախազությունը հետաքննում է Սաուդյան Արաբիայի հանգուցյալ թագավոր Աբդուլլահի կողմից Խուան Կառլոսին մի քանի միլիոն եվրոյի փոխանցումը: Ավելի ուշ Իսպանիայի նախկին միապետն այդ գումարի մի մասը փոխանցել էր Լարսենին, ով, ըստ տեղեկությունների, ապրում է Լոնդոնում, ինչը, քննիչների կարծիքով, գումարն իշխանություններից թաքցնելու փորձ էր: Թվում է, թե Լարսենի՝ Խուան Կառլոսի փողերը վերադարձնելու դժկամությունը նրանց ներկայիս թշնամանքի պատճառն է:
83 -ամյա Խուան Կառլոսը 2014 թվականին հրաժարական տվեց՝ հօգուտ իր որդու՝ Ֆելիպե VI: Այդ ժամանակից ի վեր նրա հեղինակությունը խաթարվեց այս եւ այլ սկանդալներով:
Նա անցյալ օգոստոսին հեռացավ Իսպանիայից՝ թերեւս ժամանակավորապես Արաբական Միացյալ Էմիրություններում հաստատվելու համար, այն բանից հետո, երբ իսպանացի քննիչները հետաքննություն սկսեցին հարցի շուրջ՝ արդյոք նա գումարներ էր ստանում պայմանագրով, որը Սաուդյան Արաբիան կնքել էր իսպանական կոնսորցիումի հետ:
