Սեպտեմբերի 19-20-ի ռազմական ագրեսիայի հետևանքով Ադրբեջանի կողմից գերեվարված 16 անձանց, այդ թվում՝ Արցախի ռազմաքաղաքական ղեկավարների, զինվորականների և խաղաղ բնակիչների վերաբերյալ տեղեկություններ են փոխանցվել նրանց ընտանիքներին։ Այս մասին NEWS.am-ին հայտնեց Միջազգային իրավական հարցերով Հայաստանի ներկայացուցչի խոսնակ Հասմիկ Սամվելյանը՝ հավելելով, որ այդ անձանց հարազատներին են տրամադրվել նրանց առողջական վիճակի, պահման պայմանների մասին տվյալներ, նաև նրանց լուսանկարները։
Նշվեց, որ ՄԻԵԴ-ը Հայաստանի խնդրանքով դիմել է Ադրբեջանին եւ գերեվարված անձանց վերաբերյալ ստացել տվյալներ։
«Այժմ առարկությունների փուլն է։ Այսինքն, եթե հայկական կողմը գերիների վերաբերյալ ստացված տվյաների հիման մարդու իրավունքների խախտումներ արձանագրի, ապա առարակությունները կներկայացնի միջազգային դատարանին»,-ասաց Մանվելյանը:
Իր հերթին, Կարմիր Խաչի միջազգային կոմիտեի գրասենյակից NEWS.am-ին հաստատեցին, որ անցած ամիս, մասնավորապես, հոկտեմբերի 20-ին, իրենք տեսակցել են Արցախի ռազմաքաղաքական ղեկավարության 8 անդամներին, իսկ արդեն այս ամիս տեսակցել են սեպտեմբերի 19-ին և դրանից հետո գերեվարված այլ անձանց եւս: «Այս անգամ Արցախի ռազմաքաղաքական ղեկավարության անդամներին չենք տեսակցել: Նոյեմբերին մենք առաջին անգամ կարողացել ենք տեսակցել մարդկանց, որոնք մասին մեզ տեղեկացվել է Ադրբեջանի իշխանությունների կողմից: Ուղղակի նրանց թիվը չեմ կարող նշել: Նրանց հնարավորություն ենք տվել փոխանակել ընտանեկան լուրեր»,-ասաց Զարուհի Ամատունին:
