նախընտրելի դարձնել
Արևմտյան Ուգանդայի Տորո թագավորության կառավարիչ Օյո Նյիմբա Կաբամբա Իգրուկիդի IV-ը մահացել է 34 տարեկան հասակում, գրում է New York Post-ը։
Նա մահացել է հինգշաբթի տեղական ժամանակով մոտ 22:00-ին, հայտնել է Տորոյի վարչապետ Քելվին Արմսթրոնգ Ռվոմիիրե Աքիիքին։
Մահվան պատճառը պաշտոնապես չի հրապարակվում։ Ուգանդական The Daily Monitor թերթի տվյալներով, թագավորը ծանր հիվանդ էր և բուժում էր ստանում ԱՄՆ-ում։
«Սա անսահման կորուստ է թագավորական ընտանիքի, Տորոյի ժողովրդի և ամբողջ Ուգանդայի համար»,- հայտարարել է վարչապետը՝ թագավորության բնակիչներին կոչ անելով պահպանել միասնությունն ու հանգստությունը։
Օյո IV-ը Տորոյի թագավոր է դարձել 1995 թվականի սեպտեմբերին, երբ ընդամենը երեք տարեկան էր։ Նրա հայրը՝ թագավոր Ռուկիրաբասայա Պատրիկ Դևիդ Մեթյու Կաբոյո Օլիմի III-ը, մահացել էր 49 տարեկան հասակում։ Դրանից հետո երեքամյա ժառանգը բարձրացել է գահ, իսկ առաջին տարիներին նրա պարտականությունները կատարել են ռեգենտները։
Օյո IV-ը գրանցվել է Գինեսի ռեկորդների գրքում՝ որպես աշխարհի ամենաերիտասարդ իշխող միապետը։ Նա եղել է Տորո թագավորության 13-րդ կառավարիչը, որի պատմությունն ունի ավելի քան 200 տարվա պատմություն։
Թեև Ուգանդան հանրապետություն է, և պետության ղեկավար է մնում ընտրվող նախագահը, երկրում պահպանվել են մի քանի ավանդական միապետություններ, որոնք գոյություն ունեին դեռևս գաղութային շրջանից առաջ։ Դրանք պետական իշխանություն չունեն, սակայն պահպանում են զգալի պատմական և մշակութային նշանակություն։
Թագավորը ամուսնացած չէր, սակայն, Ուգանդայի կառավարության նախարար Բալաամ Բարուգարահարայի վկայությամբ, նրա մահից հետո «գահի հաջորդականությունն ապահովված է»․ Օյո IV-ը ժառանգ ունի։
