Գերմանիայի Քրիստոնեա-դեմոկրատական միությունը (CDU) փորձում է ելք գտնել իր 80-ամյա պատմության ամենալուրջ ճգնաժամերից մեկից, գրում է dpa-ն։

Կանցլեր Ֆրիդրիխ Մերցը աճող ճնշման է բախվում տարածաշրջանային ընտրություններում մի շարք պարտություններից և ամբողջ երկրում կուսակցության աջակցության կտրուկ անկումից հետո։

Կիրակի օրը CDU ղեկավարությունը Բեռլինում սկսել է փակ խորհրդակցություն՝ հույս ունենալով վերականգնել ընտրողների վստահությունը և ամրապնդել կուսակցության դիրքերը։ Սակայն CDU-ի գլխավոր քարտուղար Ֆրանցիսկա Հոպերմանը նախազգուշացրել է, որ արագ լուծումներ սպասել պետք չէ։

«Սա կախարդական միջոց չէ, այլ գործընթացի սկիզբ, որը մենք սկսում ենք թե՛ կառավարությունում և պետական քաղաքականության մեջ, թե՛ կուսակցության ներսում», — հայտարարել է նա լրագրողներին։

Ըստ Հոպերմանի, խորհրդակցության նպատակը CDU-ին նախկին դիրքերը վերադարձնելն է, քաղաքացիների վստահությունը վերականգնելը և մարդկանց առօրյա կյանքի վրա անմիջականորեն ազդող խնդիրների վրա կենտրոնանալը։

Կուսակցությունում հաշվի են առել սեպտեմբերին կայացած երեք տարածաշրջանային ընտրությունների արդյունքներով ստացված տագնապալի ազդակները։ CDU-ից երկրամասերի վարչապետները կոչ են արել միջոցներ ձեռնարկել տնային տնտեսությունների ֆինանսական բեռը նվազեցնելու համար, այդ թվում՝ կրճատել էլեկտրաէներգիայի հարկերը և բնակչության այլ ծախսերը։

Ակնկալվում է, որ խորհրդակցության մասնակիցները նաև կքննարկեն կենսաթոշակային համակարգը, առողջապահությունը, միգրացիան, անվտանգությունը և զբաղվածությունը։ Մերցը և Հոպերմանը մտադիր են հանդիպման արդյունքները լրագրողներին ներկայացնել երկուշաբթի կեսօրից հետո։

Պահպանողականների դրությունը կտրուկ վատթարացավ սեպտեմբերյան ընտրություններից հետո։ Սեպտեմբերի 20-ին CDU-ն իր պատմության մեջ առաջին անգամ կորցրեց ներկայացվածությունը երկրամասերից մեկի՝ Մեկլենբուրգ-Առաջավոր Պոմերանիայի, խորհրդարանում։ Նույն օրը Բեռլինում կուսակցությունը առաջին տեղը զիջեց Ձախ կուսակցությանը։

CDU-ն էլ ավելի լուրջ պարտություն կրեց երկու շաբաթ առաջ Սաքսոնիա-Անհալտում․ կուսակցությունը կորցրեց գրեթե 20 տոկոսային կետ, իսկ ծայրահեղ աջ «Այլընտրանք Գերմանիայի համար» (AfD) կուսակցությունը տպավորիչ հաղթանակ տարավ։

Խնդիրներն արտացոլվում են նաև համազգային վարկանիշներում։ Մի քանի հարցումների համաձայն՝ CDU-ի աջակցությունն իջել է 20%-ից ցածր։ 2025 թվականի դաշնային ընտրություններում կուսակցությունը ստացել էր ձայների 28,5%-ը, իսկ մոտ վեց տարի առաջ հարցումներում նրա վարկանիշը կազմում էր շուրջ 40%։

CDU-ի ներսում նույնպես միասնություն չկա հետագա քաղաքական կուրսի վերաբերյալ։ Ոմանք կարծում են, որ կուսակցությունը պետք է աջ թեքվի՝ ընտրողներին վերադարձնելու համար, մյուսները հանդես են գալիս ավելի կենտրոնամետ դիրքորոշման օգտին։ Լարվածության լրացուցիչ աղբյուր է մնում AfD-ի հետ համագործակցությունից սկզբունքային հրաժարումը։ Կառավարող կոալիցիայի գործընկերոջ՝ Գերմանիայի սոցիալ-դեմոկրատական կուսակցության (SPD), հետ տարաձայնությունները՝ Ձախ կուսակցության հետ փոխգործակցության հարցում, ուժեղացնում են Մերցի վրա ճնշումը։