նախընտրելի դարձնելՖրանսիայի Լիոն քաղաքում Հայաստանի գլխավոր հյուպատոսություն է ստեղծվելու: Այդ մասին հրամանագիրը ստորագրել է նախագահ Սերժ Սարգսյանը:
«Հիմք ընդունելով «Դիվանագիտական ծառայության մասին» Հայաստանի Հանրապետության օրենքի 15-րդ հոդվածի 1-ին մասը՝ որոշում եմ. Ֆրանսիայի Հանրապետության Լիոն քաղաքում ստեղծել Հայաստանի Հանրապետության գլխավոր հյուպատոսություն՝ հյուպատոսական շրջանում ընդգրկելով Հռենոս-Ալպեր, Օվերն, Լիմուզեն, Պուատու-Շարանթ եւ Ակվիտանիա տարածաշրջանները»,- նշվում է հրամանագրում:
Ինչպես ավելի վաղ հայտնել էր NEWS.am-ը, Ֆրանսիայի հայ համայնքը` շուրջ 500 հազ. բնակչությամբ, հանդիսանում է աշխարհում ամենաստվար հայ համայնքներից մեկը: Այն կենտրոնացած է հիմնականում Փարիզ-Լիոն-Մարսել քաղաքներում:
Ռոն-Ալպ (Հռենոս-Ալպ) շրջանում եւ նրա վարչական կենտրոն Լիոնում, որը հանդիսանում է Ֆրանսիայի 3-րդ քաղաքը Մարսելից հետո, ինչպես նաեւ շրջանի այլ քաղաքներում (Վալանս Վիլյորբան, Վենիսիո, Դեսին, Մեզիո եւ այլն) հայերի թիվը ոչ պաշտոնական տվյալներով հասնում է 100 հազարի:
Լավ կազմակերպված համայնքի ջանքերով Լիոնում գործում են հայ առաքելական, կաթոլիկ եւ ավետարանչական եկեղեցիներ: Շրջանում գործում են «Radio Arménie» (Լիոն) եւ «Radio A» (Վալանս) ռադիոկայանները, Լիոնում ֆրանսերենով տպագրվում է «Ֆրանս-Արմենի» ամսագիրը, որը Ֆրանսիայում երկրորդ խոշոր համայնքային պարբերականն է «Նուվել դ’Արմենի»-ից հետո:
