Մայրաքաղաքի բակային տարածքների  ասֆալտապատման, առանձին դեպքերում էլ՝  փոսալցման աշխատանքների ծավալը 2013թ.-ին  կազմում է 1 միլիոն 100 հազար քառակուսի մետր: Գործընթացն այժմ ավարտական փուլում է:

Երեւանի քաղաքապետարանի տեղեկատվության եւ հասարակայնության հետ կապերի վարչությունից հայտնում են, թե ընդամենը 2-3 վարչական շրջաններում է, որ այս ուղղությամբ ծրագիրը դեռ շարունակվում է: Երեւանի քաղաքապետարանի 2013թ. շինբարեկարգման ծրագիրը մեկնարկել էր  մարտ ամսից: Այսօր արդեն ասֆալտապատվել , բարեկարգ ու պատշաճ տեսքի են բերվել 1000-ից ավելի բակեր ու միջբակային ճանապարհներ:

Հաշված օրեր անց մասնագիտական տեխնիկան   միայն նոր գոյացած անհարթություններն ու փոսերը վերացնելու համար դուրս կգա փողոցներ: Ընթացիկ տարում եւս հատուկ ուշադրություն դարձվեց ծայրամասային  փողոցների ասֆալտապատմանը, որտեղ բարեկարգման աշխատանքների անհրաժեշտությունը հրատապ էր դարձել: Հիշեցնենք, որ ասֆալտապատման ընթացիկ տարվա ծավալները ռեկորդային էին`2.5 միլիոն քառակուսի մետր: