նախընտրելի դարձնելՄոսկվայի եւ Համայն Ռուսիո պատրիարք Կիրիլը հայտարարել է, որ անհրաժեշտ է կանխել Ռուսաստանում նույնասեռ ամուսնությունների օրինականացման փորձերը։ Նման կոչով նա հանդես է եկել Դաշնության խորհրդում՝ սուրբծննդյան XXII ընթերցումների ընթացքում։
«Մենք վճռականորեն հայտարարում ենք. ամուսնությունը տղամարդու եւ կնոջ միություն է՝ հիմնված սիրո եւ փոխըմբռնման վրա, երեխաներ ունենալու համար», — հայտարարել է պատրիարքը եւ հավելել, որ նման միջոցառումներ պետք է ձեռնարկել ի պատասխան նույնասեռ ամուսնությունների հարցով «միջազգային լայն քննարկումների», հայտնում է «ՌԻԱ Նովոստին»։
Ռուս ուղղափառ եկեղեցու դիրքորոշումը, հավելել է Կիրիլը, պայմանավորված է «քրիստոնեության բնույթով», այլ ոչ թե երկրում քաղաքական իրավիճակի վրա ազդելու փորձերով։
Նման բարոյական օրենքներ ընդունելով` Ռուսաստանը կրոնական պետություն չի դառնա, այլ ընդհանուր բարօրության «ողջամիտ խնամակալ», ասել է նա:
2013թ. ամռանը պատրիարք Կիրիլը արտասահմանյան երկրներում նույնասեռ ամուսնությունների օրինականացումն անվանել էր «աշխարհի վերջի վտանգավոր խորհրդանիշ»:
Հիշեցնենք, որ 2012թ. ՌՈՒԵ-ի Մոսկվայի գրասենյակը շրջաբերական էր հրապարակել, որտեղ հավատացյալներին կոչ էր արել պայքարել «ագրեսիվ ազատականության կեղծ արժեքների դեմ», որոնք առաջ են մղվում «հակաեկեղեցական ուժերի կողմից»:
Շրջաբերականը ներկայացվել էր Քրիստոս Փրկչի եկեղեցում՝ Pussy Riot-ի ելույթից անմիջապես հետո:
