Քաղաքի գոտիավորման անհայտ նախագիծը խտրականության մոտեցման աղբյուր է: Այս մասին նշված է Երեւանի ավագանու «Բարեւ Երեւան» խմբակցության անդամ Անահիտ Բախշյանի՝ Երեւանի քաղաքապետ Տարոն Մարգարյանին ուղղված նամակում:

Նամակում մասնավորապես, ասվում է.

«ՀՀ կառավարության 2005թ. դեկտեմբերի 15-ի N 2330-Ն որոշմամբ հաստատվել է Երեւան քաղաքի գլխավոր հատակագիծը։ Այն գործողության մեջ է դրվել 2006թ.-ից, որով նախանշված են քաղաքի զարգացման հեռանկարները մինչեւ 2020 թվականը եւ ենթակա է պարտադիր կատարման։ Նշանակում է՝ չի կարելի քաղաքաշինական որեւէ գործողություն իրականացնել Երեւանում, եթե այս իրավական նորմով այն չի նախատեսվել: Հիշենք, որ «Քաղաքաշինության մասին» ՀՀ օրենքը հստակ պահանջ է նախատեսում առ այն, որ գոտիավորմամբ սահմանված պահանջներին հակասող քաղաքաշինական գործունեությունն արգելվում է: Այսինքն՝ միայն գոտիավորմամբ սահմանված պահանջներով պետք է իրականացվի քաղաքաշինությունը:

Երեւանի զարգացման 2010-2013թթ. ծրագրի «Քաղաքաշինություն եւ ճարտարապետություն» բաժնում ամրագրված է, որ 2006-2009 թվականների ընթացքում գոտիավորման նախագծեր են մշակվել եւ հաստատվել Կենտրոն, Արաբկիր, Աջափնյակ, Նորք-Մարաշ, Դավթաշեն, Շենգավիթ թաղային համայնքների եւ քաղաքի առանձին տարածքների (Տիչինայի փողոցին եւ Մարս գործարանին հարակից տարածքների, ինչպես նաեւ՝ Ավանի, Էրեբունու, Մալաթիա-Սեբաստիա համայնքների առանձին հատվածների) համար: Վերոնշյալ իրավական ակտերը մինչ օրս ուժի մեջ են:

Այսպիսով՝ Երեւանի առանձին վարչական տարածքների քաղաքաշինական գոտիավորման նախագծերը հաստատվել են դեռեւս 2006-2009 թվականներին, եւ Երեւան քաղաքի զարգացման 2014-2017 թվականների քառամյա ծրագրով նախատեսված չէ մշակել կամ փոփոխել այդ տարածքների գոտիավորման նախագծերը: Նշված ծրագրով նախատեսվում է միայն Նոր Նորք, Քանաքեռ-Զեյթուն եւ Նուբարաշեն վարչական շրջանների, ինչպես նաեւ Ավան, Մալաթիա-Սեբաստիա եւ Էրեբունի վարչական շրջանների չմշակված որոշ հատվածների գոտիավորման նախագծերի մշակումը:

Երեւան քաղաքի ավագանու կողմից 2013թ.-ի դեկտեմբերի 10-ի թիվ 85-Ն որոշմամբ հաստատվել է Երեւանի զարգացման 2014-2017 թվականների քառամյա ծրագիրը (Ծրագիր), որով որպես գերակայություն է հաստատվել բարեկարգ եւ հարմարավետ միջավայրի ապահովումը ինչպես Երեւանի բնակիչների, այնպես էլ մայրաքաղաքի հյուրերի համար. այդ նպատակով հանգստի գոտիների ստեղծումը, կանաչ տարածքների պահպանումն ու ավելացումը, շենքերի եւ բակային տարածքների բարեկարգումը, ժամանակակից չափանիշներին համապատասխան արտաքին ձեւավորումը, հարմարավետ եւ անվտանգ տեղաշարժի ապահովումը, ինչպես նաեւ՝ Երեւան քաղաքի վարչական շրջանների կամ առանձին տարածքների գոտիավորման նախագծերի մշակումը:

Քաղաքաշինության մասին օրենքի 14.3-րդ հոդվածի 1-ին մասի ուժով՝ համայնքի վարչական սահմաններում քաղաքաշինական գործունեությունը կանոնակարգվում է պարտադիր մշակման ենթակա քաղաքաշինական ծրագրային երկու փաստաթղթերով` համայնքի (բնակավայրի) գլխավոր հատակագծով եւ քաղաքաշինական գոտիավորման նախագծով:

Բակային տարածքների բարեկարգման կամ գոտիավորման նախագծերում փոփոխություններ կատարելու անհրաժեշտությամբ պայմանավորված Երեւանի քաղաքապետարանի համապատասխան  պաշտոնյաները երբեմն որոշում են կայացնում քանդել քաղաքացիների ինքնակամ շինությունները կամ այդպես էլ չեն օրինականացնում տարիներ շարունակ նրանց ինքնակամ շինությունները: Սակայն նկատելի է, որ գործում են երկակի ստանդարտներ, մի դեպքում քանդում են կամ օրինականացման գործընթացը մերժվում է՝ տարածքների գոտիավորման նախագծերում  փոփոխություններ կատարելու պատճառաբանությամբ, իսկ որոշ  արտոնյալների՝  այդ նույն բակերի, կանաչ տարածքների հաշվին՝ թույլատրում ու օրինականացնում են ինքնակամ շինությունները: Դեպքերն ինձանից լավ գիտեք:

Արդյունքում  խտրական մոտեցում է ցուցաբերվում քաղաքացիների հանդեպ:

Ելնելով վերոգրյալից՝ խնդրում եմ  պարզաբանել.

1. այժմ Երեւանում իրականացվող   բարեկարգման աշխատանքներն արդյոք համապատասխանո՞ւմ են տվյալ վարչական շրջանի  գլխավոր հատակագծին եւ նախատեսվա՞ծ են քաղաքաշինական գոտիավորման նախագծով,

2. ըստ տարիների՝  ի՞նչ   միջոցառումներ են  ձեռնարկվում  Երեւանի 2014-2017 թթ. Երեւանի զարգացման ծրագրով նախատեսված վարչական շրջանների գոտիավորման նախագծերի մշակման ուղղությամբ,

3. ի՞նչ  սկզբունքներից ելնելով են քանդվում կամ օրինականացվում ինքնակամ շինությունները, եթե գոտիավորման նախագծերը դեռ չկան եւ եթե կան, ապա քաղաքացիներն ինչո՞ւ նախապես չեն իրազեկվում հաստատված գոտիավորման նախագծերի մասին եւ իրենց հետ այդ ամենը չի համաձայնեցվում:

Քանի որ  վերոնշյալ ոլորտում «Երեւան քաղաքում տեղական ինքնակառավարման մասին», «Տեղական ինքնակառավարման մասին» ՀՀ օրենքներով Երեւանի ավագանուն վերագրված չեն ուղղակի եւ հստակ լիազորություններ, ապա վերոնշյալ  քանդել-չքանդելու, օրինականացնելը թույլատրելու–չթույլատրելու   խտրական մոտեցումներն անմիջապես կապվում է Ձեր անվան հետ, որն, իմ կարծիքով, հաճելի չէ Ձեզ: Առաջարկում եմ գոտիավորման խնդիրը պարզաբանելու նպատակով այս ամսին կազմակերպել քննարկում քաղաքապետարանի համապատասխան մասնագետների ու պաշտոնյաների հետ, որին կմասնակցեն նաեւ Երեւանի ավագանու անդամներ: Առաջարկում եմ նաեւ ըստ վարչական շրջանների կայքում տեղադրել գոտիավորման հաստատված նախագծերը, որոնք հասանելի պետք է լինեն մեր քաղաքացիներին:

Շնորհակալություն համագործակցության համար»: