2015թ. ապրիլի 24-ին հրապարակային միջոցառումների անցկացման վայրերում զանգվածային անկարգությունների նախապատրաստության դեպքի առթիվ ՀՀ քննչական կոմիտեի ՀԿԳ քննության գլխավոր վարչության վարույթում քննվող քրեական գործի շրջանակներում այսօր ձերբակալվել է 5 անձ։

Քննչական կոմիտեից հայտնում են, թե ձերբակալվել են  Վարուժան Ավետիսյանը, Պավել Մանուկյանը, Գեւորգ Սաֆարյանը, Ժիրայր Սեֆիլյանը, Գարեգին Չուքասզյանը։

Օրենքով սահմանված կարգով նրանց  պարզաբանվել են իրենց իրավունքները, եւ բոլորն էլ ցանկություն են հայտնել ունենալ պաշտպան։

Կասկածյալների եւ նրանց հարազատների կողմից հրավիրված փաստաբանները ներգրավվել  են որպես պաշտպաններ։

Ժիրայր Սեֆիլյանի եւ Գարեգին Չուքասզյանի պաշտպանությունն ստանձնել են փաստաբաններ  Տիգրան Եգորյանը եւ Հայկ Գրիգորյանը, Պավել Մանուկյանի պաշտպանությունն ստանձնել է փաստաբան Հայկ Գրիգորյանը, իսկ Գեւորգ Սաֆարյանինը՝ փաստաբան Գեւորգ Դավթյանը։

Կասկածյալ Վարուժան Ավետիսյանի շահերը ներկայացնում է 4 փաստաբան՝ Տիգրան Եգորյանը, Հայկ Գրիգորյանը, Լուսինե Հակոբյանը եւ Գեւորգ Դավթյանը։

Նախաքննությունը շարունակվում է, առերեւույթ հանցագործության նախապատրաստության բոլոր հանգամանքները բացահայտելու ուղղությամբ ՀՀ ԱԱԾ եւ ՀՀ ոստիկանության օպերատիվ աշխատակիցների հետ համատեղ շարունակվում են իրականացվել քննչական գործողություններ եւ օպերատիվ-հետախուզական միջոցառումներ, որոնց արդյունքների մասին տեղեկություն կտրամադրվի լրացուցիչ, հայտնում են ՔԿ-ից։