Բրիտանացի հետազոտող Նիկոլաս Ռիվզը  (Nicholas Reeves), որն առաջ է քաշել այն տեսությունը, թե Թութանհամոնի դամբարանում է գտնվում Նեֆերտիտիի գերեզմանը, Եգիպտոսի հնագիտության հարցերով նախարարությունից Կահիրե ժամանելու հրավեր է ստացել:

Եգիպտոսի իշխանությունները հաղորդել են, որ գիտնականի համար հանդիպում կկազմակերպեն  երկրի պատմության փորձագետների հետ:  Եթե Ռիվզը կարողանա բավականաչափ համոզիչ փաստարկներ ներկայացնել իր տեսությանն ի պաշտպանություն, պաշտոնյաները կքննարկեն Լուքսորում գտնվող Թութանհամոնի դամբարան համատեղ արշավ կազմակերպելու հնարավորությունը, հաղորդում է Lenta.ru-ն` վկայակոչելով The Guardian-ին:

Օգոստոսի սկզբին Ռիվզը հայտարարել էր, որ 19-ամյա փարավոնի դամբարանում  գաղտնի դռներ կան դեպի երկու շինություն, որոնցից մեկը գուցե Նեֆերտիտի թագուհու դեռեւս  չհայտնաբերված դամբարանն է: Նման եզրակացության է նա հանգել` ուսումնասիրելով դամբարանի պատերի բնական մեծության լուսանկարներն ու սկանները: