Ռուսաստանի Անվտանգության խորհրդի քարտուղար Նիկոլայ Պատրուշեւը պաշտոնյաներին քննադատել է արտասահմանյան Google-ի, Yahoo-ի եւ WhatsApp-ի ծառայություններից օգտվելու համար եւ նահանգապետերից պահանջել է միջոցներ ձեռք առնել լուծելու այդ խնդիրը:

«Խաբարովսկի մարզի պետական իշխանության մարմինների աշխատակիցները օգտագործել են արտասահմանյան տեղեկատվա-հեռահաղորդակցական  Google, Yahoo, WhatsApp եւ այլ ծառայությունների  հնարավորությունները,-հայտարարել է նա Վալդիվոստոկում արտագնա խորհրդակցության ընթացքում: Դա համակարգային  հարց է ամբողջ Ռուսաստանի համար, բայց հատկապես սուր է Հեռավոր Արեւելքում: Շրջանների ղեկավարներին խնդրում եմ հատուկ ուշադրություն դարձնել այդ հարցերին եւ համապատասխան միջոցներ ձեռք առնել»:

Անվտանգության խորհրդի քարտուղարը նշել է, որ պաշտոնյաների կողմից ծառայողական հարցերի լուծման համար արտասահմանում տեղակայված ռեսուրսների օգտագործումը լուրջ վտանգ է ներկայացնում, հաղորդում է ՏԱՍՍ-ը:

Պատրուշեւը հայտարարել է, որ «պետական իշխանության մարմինների տեղեկատվական համակարգերում նկատվել է արտասահմանյան տեխնիկական հետախուզությունների ծրագրային միջոցների առկայություն»: